Tømte boss der ny motocross-bane skal byggast

Vegen mot ny bane har vore lang for Os MC og MX-klubb, men i vår kom også støtte og den kommunale garantien og klubben er no i gang med det praktiske arbeidet.

– Den siste tida har vi jobba med å staka ut traseen, denne blei vedtatt i styret torsdag kveld, fortel formann Jane Espeland.

Mens representantane for klubben har tråkka terrenget der utvidinga av banen kjem, har dei denne veka oppdaga store mengder ulovleg dumpa avfall.

– Måndag oppdaga vi det første lasset, det har truleg blitt dumpa der i helga. Torsdag hadde det kome påfyll.

Ber om tips

Espeland trur ikkje dei som har dumpa avfallet har visst at dei saboterer for eit idrettslag.

– Men dei har nok visst at dette ikkje er rette staden å kvitta seg med avfall.

Ho har éi oppfordring: – Kom og rydd etter dykk!

Samtidig håper klubben på tips, i tilfelle syndaren ikkje melder seg.

– Vi har funne noko papir som kan vera med på å avdekka kven dette er, blant anna ein ordreseddel frå Montér på Knarvik og ein signatur. Det blei òg funne nokre tomme esker med polske sigarettar.

Byggestart i haust

Mens klubben håper at dei slepp å rydda etter andre har dei nok å gjera på med arbeidet med ny bane.

– No skal ein arkitekt, ut frå løypa vi har staka ut, laga arbeidsteikningar som entreprenørane kan grava etter.

– Samtidig er vi godt i gang med søknaden om tippemidlar. Vi har fått løyve til å starta, sjølv om vi framleis ventar på både kontrakt og dokumentasjonen på den kommunale garantien.

– Byggestart er ikkje så langt unna, men det er veldig mykje som skal på plass også etter at vi er i gang.

Kor tid banen står ferdig er for tidleg å seia.

– Om alt går på skjener, og om vinteren ikkje hindrar arbeidet for mykje, er det mogleg at det kan køyrast på banen til sommaren, utan at alt rundt er ferdig.