Trå start i ope nordisk meisterskap

Denne veka speler det norske J-16 ope nordisk meisterskap på heimebane rundt Mjøsa. Måndag møtte dei Nederland på Raufoss Stadion med Lysefjordenjenta Madelen Koldal Holme med frå start.

– Både vi og Nederland var på skuddhold, men dei traff og det gjorde ikkje vi. Vi produserte ikkje nok store sjanser til å vinna kampen, men vi blei ikkje blåst av banen på nokon måte, seier landslagstrenar Børje Sørensen til fotball.no

Opna sterkt, mista initiativet

Førsteomgangen bølga fram og tilbake utan at nokon av laga klarte å skape dei heilt store sjansene. I andre omgangen opna Noreg godt, men gav etterkvart frå seg initiativet.

– Vi opna bra etter pause og rulla over dei fleire ganger, men vi mista plutseleg initiativet i kampen då 10-12 minutt var spelt. Då kom Nederland sterkt og dei hadde ei god periode kor dei også skåra målet sitt.

– Resten av omgangen jakta vi skåring, men det var varmt og vi klarte ikkje ta dei gode vala som gjorde oss farlege nok, oppsummerer Sørensen.

Madelen Koldal Holme spelte heile kampen for det norske laget. Onsdag møter Noreg Finland på Ottestad stadion. Finland tapte sin opningskamp 2-5 for Danmark.