Bildeserie:
Traseen for nyevegen er staka ut gjennom Endelausemarka. På rekkje og rad står pinnane som viser at her skal vegen gå.
Tysdag var Midtsiden med då prosjekteringsleiar Kelly Iversen, kontrollingeniør Jostein Hårklau og kommunikasjonsrådgjevar Geir Brekke tok dei pågåande geologiske undersøkingane nærmare i augesyn.
– Dette er eit utruleg spennande prosjekt å jobba med.
– Omfanget er stort med i overkant av 26 kilometer tunell som skal drivast ut. Dei lausmassane skal plasserast, samstundes som vi skal ta omsyn til naturmangfaldet og augestikkarane i vassdraga ned mot Hestatjørna.
Prosjektet er eit av dei større på Statens vegvesen region vest sitt bord.
– Det er trass alt ein motorveg vi skal byggje, fortel Iversen.
Trafikktryggleik viktig
Vegen blir bygd med to separate løp, eitt for nordgåande og eitt for sørgåande trafikk.
– Dette vil vera med på å gjera trafikktryggleiken betre.
– Eit trafikkuhell er noko av det verste som kan skje. Også for oss som har vore med på å planlegga og prosjektera vegen gjer det vondt når slikt skjer.
– Då byrjer gjerne tankane å kretsa kring spørsmål som «kunne vi gjort noko annerleis for å hindra uhellet?», «er det ei siktlinje vi ikkje har fanga opp?», «kunne kurvaturen vore ein annan?».
– Vi veit jo at ein del trafikkulykker skjer som følgje av rus eller ville handlingar. Desse er det vanskeleg for oss å gjera noko med. Det vi må fokusera på er å gjera sjølve vegen så trygg som overhovudet mogleg, seier Iversen.
Fekk ein sorgreaksjon
Prosjekteringsleiaren, som tidlegare har delteke i orientering, fortel at det første møtet med Endelausemarka blei sterkt.
– Eg fekk ein form for sorgreaksjon første gong eg var her inne. Den stille og urørte naturen gjorde inntrykk.
– Det er fint å sitja på ein stubbe og sjå utover vatnet, men vegen skal byggast og då er det vår oppgåve å gjera det på best mogleg måte, også med omtanke til naturen.
– Dei områda som i anleggsperioden blir nytta, og som ikkje skal bli ein del av vegen eller industriområdet vil vi prøva å tilbakeføra til naturen så godt det lar seg gjera.
– Vi må òg sørgja for at avrenning frå deponia ikkje skjer ut i sårbart området, påpeikar Iversen, som har vore med på prosjektet sidan oppstarten i 2008/09.
– Men allereie i 1986 skreiv eg mine første timar på ny veg mellom Os og Bergen. Det har vore ein lang prosess fram til der vi er i dag, avsluttar Kelly Iversen.
Fakta om E39 Svegatjørn – Rådal
- 16 250 meter ny E-39
- Totalt 18 000 meter hovudveg
- 1300 meter ny fylkesveg med gang- og sykkelveg
- Totalt 26 km tunell fordelt på to løp + servicetunellar
- Finansierast gjennom bompengar og statlege midlar
- Totalkostnad: 6,2 milliardar kroner (2012-tal)
- Ligg no i Samferdselsdepartementet for utarbeiding av bompengeproposisjon.
- Kjem truleg opp i Stortinget før sommaren.
- Oppstart: 2015
- Truleg opning: 2020