Trassa regn og storm

Onsdag sette Os Revy og Teaterlag opp to eksklusive framsyningar av Desembergata 24 i Oseanasalen for barnehagane i Os. Og barnehagane kom traskande trass i regn og vind som kunne blesa ein liten kropp overende.

- Det ruska godt, men her er vi, smilte barna frå Banktjørnhaugen medan dei tok seg ein matbit i foajeen før framsyninga skulle ta til.

Dei to framsyningane var begge nesten fulle og blei godt mottekne.

- Eg har sett framsyninga før, men dette var heilt klart den beste, fortalde ei av dei vaksne på veg ut etter framsyninga.

Framleis plassar på ekstraframsyninga

Torsdag spelast Desembergata 24 to framsyninger for Ospublikummet.

- Den første framsyninga er praktisk talt heilt full, men på ekstraframsyninga klokka 19.30 er det framleis plassar, fortel regissør Linda Andersen.

Desembergata 24 har tidlegare blitt spelt frå scena i Fjellheim, men det å få komme ned i storstova i Oseana har gjort framsyninga godt. Her er det god plass for skodespelarane til å boltra seg med båder sang, dans og spel.

Ein artig liten detalj var at dei nytta meir enn berre scena i den nye framsyninga.

Byggjer på musevisa

I "Desembergata 24" møter du ein farleg katt, den sjarmerende nissen Pim som kan trylle, mange søte - og nokon litt tøffe mus, ein flott edderkopp og den nysgjerrige, hjelpsame Johannes.

Han får god hjelp frå fru Halvorsen, slik at ALLE som bur i Desembergata 24 til sist kan få feire jul.

Sjølv om alle aktørane var dyktige og gjorde det til ei flott framsyning imponerte spesielt Madeleine Midtsæter med sine solonumre som katten.

Har du ikkje ungar å ta med deg er det likevel vel verdt å ta seg ein time fri frå juleførebuingane og få med seg dei lokale teaterkreftene i årets utgåve av Desembergata 24.

Sjå klipp frå framsyninga i videoen nedanfor. (2,58 Foto: Andris Hamre)