Tre av fire frå Os på LS-lag

Torsdag starter Landsskytterstemnet i Førde. På stemne skal også Samlaga skyte lagkonkurranse mot kvarande. Amalie Evensen var i fjor med på å ta gull med Hordaland Skyttarsamlag sitt ungdomslag.

Som Midtsiden skreiv om i juni, var fire av skyttarane frå Os aktuelle for årets lag. No er det klart - tre av fire skyttarar på laget kjem frå Os skyttarlag.

– Det har vore veldig jamne resultat blant dei aktuelle skyttarane, og vi trudde dei ville nytta Noregscupstemnet i dag og morgon til det endelege uttaket, men i dag kom laget, fortel Jan Kristian Evensen, styremedlem i Os Skyttarlag.

Dette er laget

Uttaket har skjedd gjennom to eigne uttaksstemner, kor skyttarane har skote på litt forskjellige lag.

1. etappe : Markus Johannesen, Os, kl. ER
2. etappe : Sofie Evensen, Os, kl. ER
3. etappe : Amalie Evensen, Os, kl. J
4. etappe : Kristoffer Tvedt Skråmestø, Bergen, kl. J
Reserver: Sindre Taule Sandstå, Seim, kl. ER og Sander Nesbø Sælensminde, Bergen, kl. J

– Det er klart at dette er stort og utruleg kjekt, både for ungdommane og klubben.

– Det å skulle skyta uttaksstemner er ein eigen greie, med eit eige press. Det har vore litt inn og ut og litt på 1. lag og litt på 2. lag for skyttarane våre, men no har samlaget landa på at det er desse dei vil satsa på.

Skal freiste å forsvara gullet

Sjølv om dei matematiske statistikkane ikkje er med Hordaland sitt lag. Knapt nokon har klart å ta gull to år på rad, så er det ein tent gjeng som reiser til Førde.

– Sannsynligheten for at det skjer er der, sjølv om den matematisk ikkje er stor. Det handlar om dagsform. Dette er som cupspel, forklarar Evensen.

Jamnt gode resultat

Dei tre skyttarane frå Os har vist jamnt gode resultat det siste året.

– Markus har hatt ei enorm utvikling det siste året og skyt jamnt trygt på gode resultat. Han har endra fokus litt på korleis han skyt og tenkjer meir gjennom kvart skot.

– Han og Sofie er no på same høge nivå. Sofie har óg levert jamt godt denne sesongen. Amalie har helde seg på eit høgt nivå lenge, men ho har hatt nokre våpentekniske utfordringar som vi har måtte fiksa opp i. Det meiner vi at vi har fått retta opp i no, og ho er klar for både Noregscupen og Landsskytterstemnet, avsluttar far Evensen.

Midtsiden si samleside om skyting