Tre dagar igjen: Mobiliserer for Brit
– Vi vil minna folk på å stemma frå både mobil, nettbrett og pc, seier trioen frå Os Turn Handball.
Måndag 2. desember marsjerte NRK, med ein stor hale på slep, inn i Os Idrettspark for å gi Brit Eirin Tungeland beskjed om at ho er ein av fem finalistar i kåringa av Årets ildsjel under Idrettsgallaen på Hamar laurdag 4. januar.
Over 500 var nominert. Vinnaren blir avgjort ved avstemming i perioden 14. til 31. desember.
• Les òg: Handballvenar hyllar Brit Eirin
Det er knappe tre dagar igjen å stemma på. I går sto tre representantar frå Os Turn Handball på stand på Osøyro i regnvêret. Dei måtte innimellom bruka gamle handballrefleksar for å grabba tak i teltet, så ikkje vinden tok det med seg.
– Ruth Moberg er også med oss, men ho kjører rundt på butikkar i vinmonopol med flyers, seier Ingerid Verpe Jacobsen, Jan Norbeck og Camilla Førsund.
– Kva er hovudbodskapen i dag?
– Det går jo berre an å stemma éin gong, og det er nok mange som allereie har stemt. Men vi vil minna folk på å stemma, og at dei kan stemma frå alle «einingar», pc, nettbrett, mobil - og oppmoda ungane om å stemma på Brit!
• Idrettsgalla.no - her kan du stemma
Bjørnafjorden kommune kan få tre prisvinnarar
Sandvolleyballspelar Anders Mol frå Strandvik i Fusa er òg blant dei nominerte, som utøvar på årets lag saman med Christian Sandlie Sørum. Anders sin far, Kåre, er nominert som årets trenar.
Karsten Warholm (med familie i Os), Johannes Thingnes Bø, Martin Ødegaard og Ada Hegeberg er blant andre nominerte.
Her er lista over alle idrettsutøvarane som kan vinna pris under Idrettsgallaen på Hamar 2020.