Tre har mista lappen på kort tid

Politiet ser på den uavklarte situasjonen med om det skal koma eller ikkje koma ein fotgjengarovergang ved Kloppamyra som såpass alvorleg at dei har intensivert kontrollverksemda i området.

– Vi var ute der igjen torsdag denne veka, og det tok ikkje lang tid før vi traff på køyretøy med for høg fart, seier Sindre Lekven Hallem ved Os og Austevoll lensmannsdistrikt.

Fangsten blei to forenkla forelegg og eitt førarkortbeslag.

Dette er tredje gong på knappe 14 dagar at det ryker eit førarkort på den aktuelle plassen.

– Førarkortbeslaget blei gjort på ein mann i 20-åra, heimehøyrande i Os, som kom på MC. Han køyrde i 76 km/t i 50-sona.

– Det kan jo òg vera verdt å nemna at det eine forenkla forelegget blei skriven ut til ein bilførar som nytta seg av moglegheiten til å prøvekøyra ein Tesla, som hadde eit arrangement på Os denne dagen. Konklusjonen blei vel at 50-sona på Ulvenvegen ikkje var der han skulle testa motorkrafta.

Patruljen hadde også ein trafikkontroll i Hegglandsdalen torsdag. Her resulterte det i eitt forenkla forelegg.