Tredje strake

Handballdamene spelte i kveld sin tredje kamp for sesongen, og tok full pott igjen.

Kjetil Vasby Bruarøyonsdag 30. sep. 2009 20:59

Os startar sesongen med fire bortekampar, i kveld spelte dei den tredje, og no toppar dei tabellen.

- Vi hadde ei god treningsøkt tysdag, der vi kjørte ein bra gjennomgang og blei samd om spel og strategi for kveldens kamp mot Nordnes, fortel trenar Kenneth Husebø.

Sjølv om ikkje Nordnes er blant dei beste laga i avdelinga, har Os hatt problem med dei rutinerte og fysisk sterke spelarane før.

- I dag starta vi veldig dispiplinert og leia 5-0 etter ein god periode. Men så var det ein del av jentene våre som byrja å gjera nye ting, og då vi forsvann frå planen så mista vi også mykje av leiinga. Det blei tekniske feil og slurv mot slutten av omgangen.

7-9 til pause
Os leia berre med to mål til pause, men mellom omgangane fekk Husebø stramma opp litt.

- Det kom seg gradvis i andre omgang, og det siste kvarteret var det ikkje tvil om at vi kom til å vinna.

Os tok ein komfortabel 16-24-siger.

Godt forsvar
Husebø meiner laget leverte spesielt godt forsvarsarbeid i dag, og at begge keeparane sto godt.

- Anne-Lene Tysseland og Vibeke Ingebrigtsen har hatt ein god start på sesongen. I tillegg hadde vi Mona Stigen som kom innpå i andre omgang som back, gjorde det enkelt og skåra tre kjappe mål.

- Også Hilde Kristine Røttingen, som skapte mykje trøbbel for Nordnes-jentene i kveld, var ekstra viktig for oss i denne kampen.

Meir motstand i vente
I neste runde møter Os Bjørnar 2. Det ventar dei meir motstand. Så er det første heimekamp, sundag 18. oktober, der Fana kjem på besøk.

- Det blei litt kjefting i dag, men det er berre fordi eg vil ha jentene konsentrert i større delar av kampen. Vi er svært gode når vi er displinerte, noko vi må vera i dei neste kampane.

Nordnes - Os: 16-24 (7-9)
Os sine målskårarar: Madeleine Hjertnes (5), Ingvill Hefte (4, 1 av dei på straffe), Maria Stangeland (3), Mona Stigen (3), Hilde Kristine Røttingen (2), Elise Hjelle (2), Trine Balland (2), Malin Hjelle Berentsen (2) og Tonje Hjertnes (1).

Os sin neste kamp går på bortebane mot Bjørnar 2 laurdag 10. oktober.