Treng Fairtrade-assistanse

Os jobbar for å bli Fairtrade-kommune og etterlyser no frivillige. - Vi håper på hjelp frå andre som bryr seg, seier Renate Iversen.

Kjetil Vasby Bruarøyonsdag 09. mars 2011 10:20

Hausten 2009 gjekk Os kommune inn for å ta utvida samfunnsansvar, blant anna ved å utarbeida nye og revidera eksisterande etiske retningslinjer, men òg ved å gå for å oppnå status som Fairtrade-kommune.

- Det er ei rekkje krav som må tilfredsstillast for at vi oppnår denne statusen, seier Renate Iversen.

Iversen er leiar for Os Sentrumsforening og leiar for styringsgruppa som jobbar med Fairtrade-prosjektet i Os. Dei andre medlemmane er Christian Moe frå kommunen, senterleiar ved AMFI Os, Anne Kristine Tøsdal og politikar Tore Rykkel (V).

Her er nokre av krava:
• Kommunen skal servera Fairtrade-merka kaffi og te til tilsette og i møter
• Minst tre butikkar må ha til saman minst 25 Fairtrade-merka produkt i utvalet
• Minst tre serveringsplassar i kommunen skal ha Faitrade-merka kaffi på menyen
• Minst 10 arbeidsplassar, der minst 4 av dei er private, skal konsumera Fairtrade-merka kaffi

- Nå det gjeld butikkar og vareutval på 25 Fairtrade-merka produkt er vi i mål, mange daglegvarebutikkar i Os har fleire Fairtrade-merka varer, som kaffi, te og sukker.

- Når vi kjem til serveringsplassar er det noko vanskelegare. Nokre av dei er med i kjeder, og er derfor styrt av leiinga sentralt når det gjeld innkjøp og meny.

Ser etter assistentar
Styringsgruppa skal jobba vidare med å tilfredsstilla krava, og med å driva informasjonsarbeid, men ser at dei treng fleire med seg på laget.

- Det kan vera snakk om å bidra med å dela ut brosjyrar eller stå på stand på marknadsdagane, eller aktivt å ta kontakt med bedrifter for å få Fairtrade-merka produkt på plass i pauserommet. Arbeidsmengde bestemmer dei sjølv, dei som eventuelt melder si interesse for å støtta Fairtrade.

På plass i rådhuset
I Os kommune var Fairtrade-merka kaffi på plass allereie før vedtaket.

- Gunvor Heggland hos oss sørgja for det, i møtene har det blitt servert rett type kaffi lenge, seier Christian Moe.

Han blir samstundes litt usikker på om dei rette varene er på plass i kantina etter at Os ASVO overtok drifta.

- Det skal eg sjekka. Også dei tilsette i rådhuset skal få denne type kaffi og te.

Meir enn kaffi og te?
Førebels er det 27 kommunar i Noreg som har status som Fairtrade-kommune. Men er det berre kaffi, te og sukker det er snakk om?

- Nei, det er andre varer også, som tekstil og gåveartiklar. Det er også andre organisasjonar som gjer ein innsats for betre arbeidsvilkår i U-land, og merker varene frå fabrikkar med etisk god produksjon. Hos GH Interiør i Os sentrum, for eksempel, finn vi varer med slike merker.

På spørsmål om kommunen har sett nærmare på sine eigne leverandørar og underleverandørar når det gjeld etisk handel, seier Moe at dei nok kunne vore flinkare.

- I nabofylket vårt i sør måtte ein kommune til India for å sjekka arbeidsforholda der steinen dei hadde bestilt til ein offentleg plass blei produsert. Å sjekka forholda i utlandet er krevjande.

Samstundes seier han at Os saman med andre kommunar har fokus på etisk handel ved fleire større innkjøp.

- Fleire av innkjøpa våre blir gjort i samarbeid med andre kommunar, i eit samarbeid fleire er med på, men som Bergen kommune styrer. I denne gruppa er etisk handel eit fokusområde, seier Moe.