Tropisk storm på veg til Vestlandet

Restane av den tropiske stormen «Helena» er på veg til Norskekysten og Vestlandet.

– Den kjem med varm luft og kraftig vind, opptil 20 varmegradar og opptil 35 m/s i kasta, seier Lillian Bergheim i StormGeo til BT.

Det er meldt sterkast vind på Mørekysten, mens vi i Os slepp unna med 14-15 m/s, altså stiv kuling.

Vinden skal koma frå sør og sørvest, og er venta å auka i styrke onsdag kveld. Den skal halda seg over 10 m/s i styrke fram til torsdag kveld.

Det er full flo i Os klokka 19.38 onsdag kveld og 08.36 torsdag morgon.