- Trudde ikkje det eg såg

Det blei ein tøff start på dagen for tilhøyrarane i retten då politioverbetjent André Simonsen gjorde greie for mobiltrafikk og samtalane mellom heimesjukepleiarane og 112.

Aktor gjengav skildringa vakta hos HT Safe gav av det ho høyrde då tryggleiksalarmen til Hilda Feste blei utløyst. I svært sterke ordelag skildra vaktoperatøren dei lydande vedkommande høyrde i bakgrunnen.

- Det var ein forferdeleg lyd og roping, refererte aktor.

- Kva i helvete som skjer?

Heimesjukepleiaren som hadde vakttelefonen var hos ein annan brukar i Gamleheimshagen då ho fekk melding frå tryggleiksalarmen. Etter å ha gjort seg ferdig med brukaren gjekk ho ned til Hilda Feste sitt husvære.

I retten forklarte ho at ho reagerte på at døra sto open. Vidare fortel ho at ho gjekk inn i huset og etterkvart observerte bein på golvet mellom badet og soverommet og det ho opplevde som tydlege samleierørsler.

- Då eg fekk summa meg og oppfatta kva som skjedde ropte eg "kva i helvete som skjer?" forklarte heimesjukepleiarane.

Dette fekk gjerningsmannen til å gjera ei brå rørsle og heimesjukepleiaren fann det tryggast å rømma frå staden.

- Eg var redd han skulle koma etter meg, forklarte ho i retten, før både aktor og forsvarar stilte fleire spørsmål om kva ho hadde sett, kor ho sto og kva ho tenkte.

Fleire av svara baserte ho på den rekonstruksjonen ho var med på saman med Kripos ei tid etter drapet.

- Då eg var på rekonstruksjona og det blei det klart kva eg høyrde, var eit døme på korleis den hjelpte å bringa fram igjen minne og lydar frå kvelden 1. januar.

Venta utålmodig

Før heimesjukepleiaren forklarte seg i Nordhordland tingrett torsdag hadde retten fått spelt av fleire lydfiler mellom 112 og personell i heimesjukepleien.

Dei to sjukepleiarane som blei varsla frå sjukepleiaren som først var inne, sto i løpande kontakt med operasjonssentralen og fekk løyve til å gå inn i husværet igjen, sjølv om politiet ikkje var kome på staden.

Det var tydeleg frustrasjon blant sjukepleiarane over at det tok så lang tid før politiet kom fram. I deira verd var det viktigaste å sjå om dei kunne gjera noko for Hilda Feste.

Då dei to gjekk inn i huset slo dei fort fast at Hilda Feste var drepen.

- "Ho er død. Ho er drept!" var meldinga retten fekk avspelt torsdag.

Omsorg for kvarandre

Operasjonsleiar lurte på om dei kunne yta førstehjelp til kvinna, men samtalen slår fast at det ikkje var mogleg.

- Dette er noko av det verste eg har sett, fortale sjukepleiaren til operasjonsleiar.

Dei to trakk seg difor ut av husværet for å venta på politipatrulja som då var mellom Kaland og Os.

Frå banda som blei spelt i retten slår det ein kor omsorgsfulle sjukepleiarane er for kvarandre. Dei er i sjokk, men likevel høyrer vi utsagn fulle av omsorg for kvarandre.

- "Hei, my love", blir opptaket avslutta med.

Fleire kollegaer frå heimesjukepleien var tilstades i retten torsdag. Det var tydeleg tøft å høyra korleis kollegaene hadde hatt det dei skjebnesvangre minutta 1. januar.

Retten held fram klokka 13. Då med vitne i tiltalte si omgangskrets og vitne som møtte tiltalte på veg frå fest og mot heimen/åstaden.