– Trur ho ville ha ei ekstern vurdering

Bildeserie:

1 av 1

Fredag kveld vann Yvonne Nordvik Sivertsen TV2-konkurransen The Voice. Yvonne, som hadde Espen Lind som mentor, song låta «Youth» og vann over Øyvind Boye i finalen.

– Eg er utrueg glad på Yvonne sine vegne, seier tvillingsøstera Malin.

Dei to fyller 19 år i september og er klassevenninner og avgangselevar ved Langhaugen vgs.

Gjekk i klasse med Aurora

Yvonne og Malin er fødd og oppvaksen på Drange i Os. På Lysekloster barneskule gjekk dei i klasse med blant andre fenomenet Aurora (Aksnes), som denne veka har turnert i California og tysdag hadde Katy Perry på konserten sin og backstage.

– Vi var vel aldri ein spesielt musikalsk klasse, men Yvonne song ofte solo på skuleavslutningar og liknande, seier Malin om det som no framstår som eit musikalsk «gull-kull» i Lysefjorden.

Sjølv speler Malin piano og syng, og har vore elev saman med Yvonne på Os Kulturskule.

Malin og Yvonne song også saman på UKM i Fjellheim i 2008. Då spelte og song dei «Heaven» av Bryan Adams.

Tøff kamp om gode karakterar

Ungdomsskulen gjekk dei to i Fana og dei er også klassevenninner på vidaregåande skule, på musikklinja på Langhaugen.

– Det er mykje konkurransar på skulen òg. Eg trur det er litt av årsaka til at Yvonne meldte seg på The Voice, at ho ville andre sitt syn på vokalen sin.

– Eg har inntrykk av at skulen har mest fokus på klassisk, at rytmisk kan bli litt tilsidesett. Derfor var det ekstra godt at Yvonne har gjort det så bra, synest Malin.

Onsdag skal dei to opp til eksamen - i song.

– Det blir spennande, Yvonne har karakteren 4 frå før, røper søstera, noko ho synest er rart, ikkje minst etter sigeren fredag.

Heile familien på fest

Før eksamen er det fest, og Malin var naturlegvis i Oslo og såg finalen.

– Både eg, bror min, foreldra våre, kjærasten min og nokre venar, blant anna Eirin Austevoll frå Os, fekk med oss showet og er no på fest.

– Det er veldig god stemning her og mange som gler seg på Yvonne sine vegne.