Under streken før siste runde

Os og Bjørnar kjempar om å unngå nedrykk til 3. divisjon i årets sesonginnspurt.

Os slo Bjørnar 28-23 i førre heimekamp, men Bjørnar, som hadde éin kamp mindre spelt, tok to poeng mot Fana 2 onsdag, er a poeng med Os, men framfor på tabellen grunna samla resultat etter to innbyrdes oppgjer med Os.

– Fana 2 leia med 5-6 mål då det var 5 minutt igjen. Bjørnar kom seg ajour og sette inn vinnarmålet på frikastoppstilling i siste spelesekund, seier Os-trenar Gitte Torp, som sjølv var i Fana og såg kampen.

– Bra gjort av Bjørnar, men irriterande for oss.

Blir avgjort søndag formiddag

Søndag klokka 11.30 blir siste serierunde spelt. Os tar imot nettopp Fana 2.

– Det blir uvant med kamp så tidleg på dagen, men vi skal samlast til felles frukost og skal vera klare for kamp!

Oppskrifta på å halda seg i 2. divisjon er no enkel; Os må ta to poeng, samtidig er dei avhengige av at Fyllingen slår Bjørnar. Fyllingen har 11 sigrar og 10 tap før serieavsluttinga, Bjørnar har 5 sigrar og 16 tap.

Speler med knekt finger

Os kan, med unntak av Liv Pauline Lunde, stille med same tropp som då dei slo Bjørnar i førre runde.

– Som erstattar for Liv har vi tatt inn Regine Steen, som har vore skadd sidan før jul. Det blir kjekt å ha ho med igjen. I tillegg har eg skrive opp Madeleine og Gry på dommarkortet. Sjølv om dei er skadd vil eg heller ha dei på benken med meg enn på tribunen i denne spennande serieavsluttinga.

Også Hilde Kristine Røttingen er skadd, men med i troppen.

– Ho har ein knekt finger, men ho har spelt fleire kampar med denne fingeren allereie, så ho er til stor hjelp.

– Hilde Kristine sitt jentelag frå Nore Neset lagde mykje stemning på tribunen i førre kamp. Har det mykje å seia?

– Ja, det har veldig mykje å bety. Dei gongane det er mykje publikum, og om det er litt liv og lyd i publikum, så er det det første jentene kommenterer etter kamp. Det er klart det hjelper for dei som skal henta ut ekstra krefter, og halda fokus og innsatsvilje oppe, at dei merkar at nokon heiar på dei.