Klubbmeisterskap Bjørnefjorden Golfklubb

Ungdomen tek over

VIDEO: Ungdommane Alexander Heggland og Cecilie Langeland Olsen vann klubbmeisterskapet på Bjørnefjorden suverent.

image
image
image
image
image
image
image
Av: Andris Hamre

Klubbmeisterskapet fekk ein blaut start med overvatn på bane og greenar då det starta laurdag morgon.

- Det var blaut, men likevel fine speletilhøve, fortel Alexander Heggland, vinnar av herreklassa.

Heggland viste stabilt og godt spel og gjekk dei første atten hola to slag under par, likt med banerekorden til Bjørnefjorden golfklubb.

- Det var vindstille, så det var berre å angripe pinnen og sørge for å halde seg fri av roughen, oppsummerar Heggland dag ein.

Tangerte banerekorden igjen

Den andre runden laurdag gjekk han på par (68 slag) og leia med seks slag på tidlegare proff Øystein Engevik. Dei to gjekk saman i leiarballen sundag.

- Frykta du at Engevik ville ta deg att på siste runden?

- Nei, eg gjorde eigentleg ikkje det. Spelet mitt var såpass stabilt at eg visste eg hadde gode sjansar.

- Når eg leia med 10 slag etter dei første ni hola i dag var eg sikker på at dette ville gå vegen, fortel Heggland som i januar måtte operera kneet og difor har fått eit dårlegare treningsgrunnlag enn ønska.

- Det eg var mest spent på var om kneet hold. I endel turneringar tidlegare i sommar har eg måtte gje meg, men denne helga gjekk det bra, smilar ein letta unggut.

Spennande kamp om andre plassen

Meir spennande var det eigentleg om Sverre Marcelius ville klare å ta att dei tre slaga han lå bak Engevik. Marcelius gjekk i ballen før dei to i leiinga. Etter 18 hol tok han inn eitt slag på Engevik og hamna dermed på tredjeplass, to slag bak Engevik og heile tolv slag bak suverene Heggland.

- Det er godt å sjå at ungdommen kjem og tek over, skryt Marcelius, som òg er trenar i golfklubben.

Leia med eitt slag

Dameklassa, med berre to spelarar, var meir spennande enn herrane sine. Etter laurdagen leia Cecilie Langeland Olsen med eitt slag på Mia Helen Hansen Hjelle.

- Eg slo ballen bra i går òg, men det satt likevel ikkje heilt.

- Med ei så knapp leiing, var du redd å miste den?

- Eg må vera så ærleg å seie at eg var ikkje det. Spelet mitt var bra og i dag spelte eg godt.

- Etterkvart byrja puttane å sitta òg så då følte eg at eg hadde god kontroll, fortel Langeland Olsen.

Då dei to damene avslutta etter 18 hol hadde Langeland Olsen rykka frå og vann med ti slag etter ei 75 runde.

VIDEO, 2:18: Sjå dei to siste herreballane og dameballen avslutta på hol 18. (Foto: Andris Hamre)

Fleire saker