Ut og inn av PBU
Han er på 3. plass hos Høgre etter valet, men blei ikkje innstilt til nokre av utvala. Men no er Jonny Garvik tilbake.


Høgre har 2 av 9 representantar i kvart av dei tre største utvala. Då dei for to veker sidan presenterte personane dei vil ha inn i desse utvala hadde det blitt hoppa bukk over Jonny Garvik.
Garvik, som sit i plan- og bygningsutvalet, hamna etter fleire personstemmer på 3. plass på Høgre si liste over kommunestyrerepresentantar, men hadde i innstillinga ikkje fått plass i nokre av utvala.
Inn igjen i utvalet
I plan- og bygningsutvalet, der Høgre har fått leiaren, vil partiet ha Ståle Skaathun som leiar. Den andre faste plassen gjekk til May Brit Haringstad Mjøs.
Les òg: Innstilt som leiar
Men denne veka fekk Midtsiden høyra at Garvik er tilbake og no er innstilt som medlem i plan- og bygningsutvalet også for 2011-2015.
Kva skjedde?
Tysdag skal nytt kommunestyre konstituerast og personane i utvala godkjennast.
– Kva er det som gjer at Garvik er tatt ut og inn av lista?
– Kommunestyregruppa vår hadde Garvik på lista, men på medlemsmøtet for to veker sidan kom det krav om å stemma over kven som skulle inn. Det blei argumentert for at vi burde ha ei kvinne i utvalet og Mjøs blei valt, fortel listetopp og varaordførar Marie Lunde Bruarøy.
– Men det burde ikkje skjedd, det er vi i gruppa som skal velja personar til utvala. Dette var ein feil og det er mitt ansvar, men denne veka gjekk vi tilbake på det og Jonny er på lista igjen.
I tillegg til at Jonny er høgt på lista ser Høgre det som nyttig, spesielt sidan dei har leiaren, og Skaathun er ny i utvalet, å ha Garvik si erfaring med vidare.