Vann med eigne låtar
Video: Torbjørn og Jone frå 10 A imponerte med eige materiale då dei vann talentkonkurransen på Os ungdomsskule fredag.
Inspirert av Idol og Norske talenter dro elevrådet rett etter vinterferien i gang talentkonkurranse for elevane ved Os ungdomsskule.
- Vi hadde ei innleiande runde med 11 bidrag kor seks tok seg vidare til semifinalen.
- I semifinalen forsvann to ut og vi sto att med dei fire du ser på scenen her i dag, fortel Hillevi Brita Høyem i elevrådet.
Vart og vakkert
Først ut i finalerunden var Silje frå 10 B. Med gitar og ein nydeleg stemme framførte ungjenta to rolege og vare ballader som gjekk rett heim.
Gutta boys
Samson, Marcus, Ola og Bendik frå 9b og 9c viste at også norske gutar kan boyband-sjangeren.
Moves, flørting med publikum og høg showfaktor viste dei sjølvsikre gutane frå scenen.
Michael Jackson
Dansegruppa med Annika, Julie, Isabell, Sara og Antine frå 9 e hylla den avdøydde popstjerna Michal Jackson.
Jentene viste ein imponerande rytme og samstemmigheit i dei to dansenumra.
Skreiv på bussen og i storefri
Fjerde par ut var Torbjørn og Jone frå 10 A. Dei to guttane smelte like godt til med to eigenproduserte songar.
- Denne skreiv vi på bussen rett før audition.
- Vi skal framføre den på ein gitar som manglar to strenger, fordi det var den einaste vi hadde, smilte Torbjørn før dei gjekk på scenen første gongen.
Låt nummer to blei skriven på like kort varsel.
- Denne blei til i storefri dagen før semifinalen, forklarte Torbjørn.
At publikum og juryen likte eigeprodusert materiale er det liten tvil om. Til juble frå medelevane på ungdomsskulen blei dei to unggutane utropt til vinnarar av talentkonkurransen 2013.
De er alle talent
Før elevane fekk gå tilbake til klasseromma og ta påskeferie hadde rektor Kåre Lutro ei helsing til dei.
- De er alle talent!
- Desse som har vore på scenen i dag, har vist sine talent på dette området.
- De som sit i salen har også talent, om ikkje innan sang og musikk så på andre områder.
Video (4 min 9 sek): Sjå dei åtte innslaga under talentfinalen i gymsalen på Os barneskule (foto: Andris Hamre)