Vann "Mildeskvetten"

To båtar frå Os stilte i Mildeskvetten laurdag, og segla inn til 1. og 2. plass i kvar sin klasse.

Kjetil Vasby Bruarøysøndag 10. mai 2009 21:13

Laurdag 9. mai arrangerte Milde båtlag sin årlege regatta "Mildeskvetten". Frå Os stilte Hans Leganger Fjell med sin Albin Express (lys 1.12), som førebels er utan namn, og Svein Skoglund med Tina for II.

Fjell hadde med seg Erik Berglund og Jon Arne Opstvedt i klassen lys med spinnaker opp til 1.15. I klassen lys med spinnaker 1.16 – 1.24 stilte Tina for II Maxi Mixer CR (lys 1.16), med Svein Skoglund som rormann og mannskap som var forsterka med Kjetil Eriksen.

- Vêrmeldinga sa 11 til 12 m/sek så vi skjønte at det kom til å bli ein livleg dag på sjøen, seier Svein Skoglund.

Starten på regattaen er sør for Hærøy i Fanafjorden, løypa gjekk vidare til Kyrholmen, bøye aust for Blia, bøye i Bjelkarøyosen, bøye sør for Horsøy og mål ved Herøy.

Vinden var aukande frå 11 m/sek ved start, så Tina for II reduserte til dei minste segla medan Fjell og mannskapet måtte segla med det eine seglet dei hadde om bord.

Passerte 11 knop
På kryssen mot Kyrholmen auka vinden, og var oppe i over 15 m/s i kasta. Bølgjene var hissige, så fleire valte å bryta. Men Os-båtane heldt stand.

- Dei store båtane hadde fordel i bølgjene, men gjengen om bord i den 26 fot store Expressen tålte stampinga og klarte med fantastisk segling å koma i mål til ein fin 2. plass.

Tina for II er 35 fot, men likevel vaska bølgjene over dekk. Med litt for mykje segl blei den liggande flatt på sjøen, men med god innsats av mannskapet klarte dei å halda 6,5 knop på kryssen.

- Etter runding Kyrholmen var vinden for sterk til at vi kunne setja spinnaker. Vi såg ein gul spinnaker bak oss, men den blei fort vekke igjen, tatt ned av mannskapet eller kulingen, seier Svein.

Vinden heldt fram med å auka, og då "Tina for II" runda Blia hadde dei ein fart på over 11 knop. Det blei vidare slør opp til merke i Bjelkarøyosen, ny kryss ut til merket ved Horsøy og slør inn Fanafjorden til mål ved Herøy.

- Eit utmatta mannskap kunne krysse mållinja som vinnar av klasse lys 1.16 – 1.24, fortel rormann Svein Skoglund.