midtsiden

Vann stipend

Før VG Topp 20-konserten i Bergen onsdag starta, var seks medlemmar frå Lysefjorden Ride- og Kjøreklubb på scenen. Her kan du sjå filmen som gjorde at dei vann 10.000 kroner.

Av: Kjetil Vasby Bruarøy

Norsk Rikstoto sponsar VG sine topp 20-konsertar, og har hatt ein konkurranse gåande for stallar og rideklubbar på Vestlandet.

- Konkurransen om fire stipend på landsbasis, kvart på 10.000 kroner, blei lyst ut i mai. Vi vann stipendet for Hordaland, Sogn og Fjordane og Møre og Romsdal, fortel Marte Engelsen.

Film om innsats for unge
Klubbane konkurrerte ved å laga ein film om korleis klubben eller stallen jobba for å ta hand om dei yngste ryttarane, eller ryttarar som er rørslehemma.

- Ei jente som har hest i stallen tipsa meg tidleg om konkurransen, sidan eg studerer film- og tv-produksjon ved Universitetet i Bergen, seier Marte.

Dei var fleire som filma, men Marte sto for klipp og innsending. I juni fekk dei gladmeldinga om at dei hadde vunne, og i går fekk dei sjekken på 10.000 kroner.

- Det var eit show før konserten, men det var allereie mykje folk framfor scenen. Vi var seks medlemmar som reiste til Bergen for å ta imot stipendet.

Ungdom arrangerer for ungar
Eit av dei viktigaste tiltaka for dei yngste i Lysefjorden Ride- og Kjøreklubb er "Vårspretten". Arrangementet er for dei heilt yngste, og blir styrt av ungdomen.

- Det at det er ungdom og ikkje vaksne som arrangerer var noko juryen til Norsk Rikstoto likte godt, fortel Marte.

Utanom "Vårspretten" har dei unge medlemmane i klubben blant anna fleire sjansar til å ta rideknappen i løpet av året. Både Vårspretten og kunnskapstestane er blant det som er filma i bidraget klubben vann stipendet med.

Ny bane og nye kurs
Klubben har rett under 200 medlemmar, vaksne og unge, frå 1. klasse-alder og opp.

- Vi startar nye kurs i siste halvdel av august. I slutten av august skal også ein ny, stor utandørsbane vera klar.

Nytt frå 1. august er det også at klubben overtar drift av heile Os Hestesportssenter, frå rideskule til stall.

- Kva skal stipendet brukast til?

- Pengane går til dei etablerte arrangementa for unge, som Vårspretten og rideknappen, stadfestar Marte Engelsen.

Fleire saker