Våpen var telefon

- I tillegg til eit travelt døgn på Os har vi vore med og bistått politiet i Fana, så det har vore mykje jobbing på heile gjengen, fortel politibetjent Anne Lyssand.

Det er berre ein patrulje på vakt i helgene så Lyssand håpar at innbyggjarane forstår at dei, i travle tider, ikkje er like lett å få tak i.

- Vi gjer så godt vi kan, men det er ikkje alltid vi strekkjer til.

Røyk i tunell

I 12.30-tida fredag stoppa politiet ein bil i Storestraumen.

- Vi sjekka bilen og fann ut at alt ikkje var i orden, så bilen blei avskilta, fortel Lyssand.

I 13.30-tida fekk dei melding om to kjenningar av politiet som trua kvarandre ein stad nær sentrum.

- Det var mistanke om tjuveri, den eine påstod at den andre hadde stole ein PC frå han.

Personane blei satt i forvaring og skal avhøyrast i dag.

Det kom melding om røyk frå ein bil inne i Liafjelltunnellen i 17.50-tida fredag. Då politiet kom på staden var bilen vekke.

- Vi reknar med dei ordna opp på eigehand.

"Våpen" i sentrum

I 20.30-tida fekk politiet telefon i frå ein meldar som påstod at han såg ein mann med våpen i Os sentrum.

- Meldar gav oss ei beskriving av mannen og forklarte at det var to menn og ei kvinne i ein bil som denne mannen høyrde til, seier Lyssand.

- Men, då vi sjekka overvåkingskamera så viste det seg at mannen ikkje hadde våpen, men ein mobiltelefon.

I ett-tida natt til laurdag prøvde ein bilførar å køyra frå politiet på Byvegen då dei skulle stoppa han.

- Vi tok igjen bilen og tok promillekontroll av føraren. Den slo ut så han blei sendt i fengslingsforvaring og det vil bli oppretta sak.

Ukjent mann ville inn i hus

I 02.30-tida kontakta vektarar politiet då dei oppdaga ein kjenning av politiet som gjekk rundt med ei trillebår og hadde ei sykkelvogn på slep i Idrettsvegen.

- Vektarane mistenkte at personen hadde stole vogna.

Politiet var då ute på anna ærend og fekk ikkje sjekka opp i saka.

På Solsiden var det ein vanskeleg gjest i starten på 30-åra. Mannen nekta å oppgje personalia til politiet og blei sendt i drukkenskapsarrest.

Midt på natta fekk politiet ei melding om ein mannsperson som prøvde å ta seg inn i eit hus litt utanfor sentrum.

- Mannen gjekk rundt huset og banka på vindauga, men då dei som budde der ikkje slapp han inn så forsvant mannen mot sentrum.

I 04.30-tida måtte politiet rykka ut etter melding om eit familieforhold.

- Det var ikkje born til stades i bustaden, men mannen blei pågripen og tatt med av politiet, avsluttar Lyssand.