Var ikkje falsk bøssebærar likevel
OPPDATERT: Os Røde Kors blei varsla om ein som gjekk frå dør til dør på Søfteland - men dette var ikkje i falsk ærend.
Torsdag og fredag har det kome meldingar om noko som truleg er innsamling under falsk flagg.
– Ein person i Røde Kors-vest har gått på dørene på Søfteland, men vi har ikkje denne formen for aksjon no. Om du møter vedkomande, ring politiet, skreiv korpsleiar i Os, Atle Vågstøl på Facebook fredag.
Fleire kommentarar til innlegget stadfestar at vedkomande med vest har vore på innsamling både på Furufaten, Vesterlio og Sælehaugen torsdag.
– Håper ingen bøsser er stolne
For ei god veke sidan sette Os Røde Kors ut 28 bøsser på butikkar, bensinstasjonar og andre folksame plassar i bygda.
Inntektene går til dei som er ramma av den omfattande svoltkatastrofa aust i Afrika.
– Dette er første gong eg høyrer at nokon har brukt Røde Kors for å driva falsk innsamling i Os. Men vi har blitt åtvara mot tjuveri av bøsser frå butikkar, så dei fleste bøssene er stripsa fast, seier Kristian Strønen hos Os Røde Kors.
– Desse bøssene skal samlast inn måndag. Ein vest går an å lura til seg, men no håper eg ingen av desse bøssene er stolne.
OPPDATERT: I 15-tida får Midtsiden ny melding frå Røde Kors. Vedkomande som gjekk ein runde på Søfteland før helga er ein frå Røde Kors som var ute etter å verva fleire medlemmar.
– Vi visste ikkje om dette, og det er litt uheldig timing, sidan vi har denne andre aksjonen samtidig. Men eg er glad for at det viste seg at dette likevel var eit ærleg ærend, seier Strønen til Midtsiden laurdag ettermiddag.
Tidlegare i dag, då han framleis trudde dette var nokon som dreiv innsamling i Røde Kors sitt namn til inntekt for seg sjølv, var han klar på kva han synest om denne formen for lureri.
– Å misbruka ein aksjon som skal samla inn pengar til svoltne barn i Afrika, for sjølv å få seg nokre hundrelappar. Det kan vel knapt bli meir lågmål.