Variert orgelkonsert
Kyrkjelyden inviterar til ein variert konsert med unge talent i samspel med kantor Andrew Holman på Nore Neset.
Os kyrkjelyd arrangerar kvart år 4-5 konsertar i serien "Musikk i kyrkja". Sundag førstkommande klokka 19 har organist og kantor Andrew Holman teke med seg Renate Ekerhovd og Sondre Engesæth frå Kongshaug Musikkgymnas til eit variert program på Nore Neset.
- Dette blir den første av denne type konsertar her på Os for min del, fortel Andrew Holman, som riktig nok bidrog på tagentane under ein av adventskonsertane i november også.
Betre akustikk og orgel
Konserten har den rutinerte organisten vald å leggje til Nore Neset kyrkje.
- Det skyldast at kyrkja på Nore Neset har ein betre akustikk og er betre eigna for denne type konsertar enn kyrkja på Os.
- Orgelet på Os blei bygd på 1950-talet og det var ikkje av dei beste åra for orgelbygging i Europa.
- Noko av grunnen til at eg tykkjer orgelet på Nore Neset egnar seg betre er at det står fritt i rommet, medan orgelet i Os kyrkja er bygd inn, forklarar Holman.
Unge talent
Med seg på konserten har Holman fått songar Renate Ekerhovd og Sondre Engesæth på piano og bratsj. Engesæth fekk i juni 2011 tildelt Norsk Tipping og Norsk kulturskuleråd sitt draumestipend.
- Eg gler meg til å spele saman med desse to dyktige unge musikerane, smilar organisten.
Konserten vil ha eit variert program med orgelmusikk av tradisjonelle komponistar (Bach og Buxtehude), Bjarne Sløgedal, Blues av Jon Laukvik, fransk romantisk musikk og songmusikk av Mozart, Mendelssohn og Rachmaninoff.