Vegarbeid. Eller?
Då det blei etterlyst drenering av eit fortau på Bruarøy gjekk det ikkje lang tid før eit nytt skilt kom på plass. Men sjølve arbeidet var det verre med.


– Kvar dag går det skuleungar ut i vegen på dette strekket, som er ein plass der enkelt kjører litt fort forbi, seier ein innringar til Midtsiden.no.
I desember i fjor fekk vi melding frå folk i Øyane som håpte på at det svært oversvømte fortauet skulle bli drenert før vinteren og isen kom.
Les òg: Dette er eit fortau!
– Det gjekk berre ein månad før nokon kom ut og sette opp eit skilt. Skiltet seier at det pågår vegarbeid i området, men noko arbeid har vi førebels ikkje sett.
I starten såg det ut som om arbeidet var i gang, men no har folk inntrykk av at både skilt og fortau er gløymt.
Røtingavegen er ein fylkesveg (Fv 158) så det er Statens vegvesen som har ansvar for vedlikehald.
Mangla kart
Vegvesenet stadfestar at dei kjenner til det oversumte fortauet og seier dei har vore og sett på saka.
– Men det viste seg at kartet som viser eksisterande røranlegg og kummar i området ikkje var oppdatert. Det er ikkje problem å leia vatnet vekk, men vi må veta kvar vi skal leia det, fortel Morten Solholm.
Akkurat kva som er status for vedlikehaldsprosjektet er Solholm ikkje sikker på, men har er einig i at det no er på tide at det kjem eit stykke vidare.
– Vi skal få fortgang i denne saka og sjekka opp kva vi treng for å få vatnet unna, seier han.