Vegard blei noregsmeister i trial

Bildeserie:

1 av 3

I helga var det trialfest i Hardanger med tredje noregscupritt fredag og NM laurdag. Både noregscupen og NM hadde rekordmange deltakarar, med 27 i NC og 31 i NM.

Osingen Vegard Bolstad Bjørø, som fyller 18 år i sommar, syklar for Vestkant Trial.

Han har vunne både den første og andre noregscupen i år, og stakk også av med sigeren fredag. Laurdag blei det jamnare, men Vegard sikra seg NM-tittelen.

– I fjor fekk eg fjerdeplass, dette er mitt første NM-gull, seier Vegard til Midtsiden.

Færrast prikkar og best tid

Han skildrar trialkonkurransanepå denne måten:

– Det er ei løype med 5-6 seksjonar. Du tar løypa tre gongar. I kvar seksjon er det fleire hinder og hopp, tar du beina i bakken så får du prikkar. Den med færrast prikkar vinn.

Tar du éin fot nedi så får du 1 prikk, tar du begge beina nedi får du 5 prikkar. Har du 5 prikkar må du ut av seksjonen og ta den éin gong til.

– I ekspertklassen var fortsatt Bjørø best, og vann med berre åtte prikkar. Men Even Lippestad heva seg mange hakk fra NC-rittet, og fikk også berre åtte prikkar. Med like poengsummar på kvar seksjon blei det førstemann i mål, og Bjørø vblei ferdig ni minutt før Lippestad, skriv biketrail.no.

Tredjeplassen gjekk til Kristian S. Bergersen med 15 prikkar.

Fire klassar

Utøvarane kan velja mellom fire klassar; nybyrjar, vidaregåande, ekspert og elite.

Vegard er i sin tredje sesong i ekspertklassen.

– Held eg fram som dette i dei siste noregscuprundane bør eg kanskje opp i eliten neste sesong, seier den nybakte noregsmeisteren.

Trener kvar dag

Bjørø starta med trial for 4-5 år sidan.

– Det byrja med at eg likte å sykla på bakhjulet og å hoppa med sykkel. Etterkvart meldte eg meg inn i klubb, i Vestkant Trial, som er ein av få klubbar i Noreg, og så blei det konkurransar.

– Eg trener nesten kvar dag, rundtom i Os og på far min sin verkstad i Kolskogen.

Han seier det er eit par andre i Os som òg driv med trial og triksing.

– Erik Matre har halde på nokre år, men det er mest street, ikkje så mykje organisert, i tillegg er Isak Aspevik aktiv. Han har hatt god framgang og er ny i ekspertklassen i år.

– Isak er skadd, og er dessutan på ferie, så han kunne ikkje vera med i NM i helga.