Ventar minst 700 på kamp

Klokka 18 onsdag kveld tek Lysekloster i mot eliteserielaget Haugesund i andre runde i cupen.

– Vi er klare. No har vi akkurat gjort banen klar og stengt av den, så no kan berre Haugesund komma, seier sportsleg leiar Svein Kollen.

Håper på opp mot 1000 tilskodarar

Kollen er optimist før kveldens kamp. Både når det gjeld resultat og publikumsoppslutninga.

– Vi har hatt førehandssal av billettar, men eg har ikkje oversikta her og no på kor mange billettar som er seld.

– Kor mange håper de kjem då?

– Kjem det mellom 700 og 1000, så skal vi vera nøgd. Vi har greitt med parkering rundt banen og på tilstøtande parkeringsplasser, så det skal ikkje vera noko problem.

Nær fulltallig tropp

Når det gjeld troppen Lysekloster stiller med mot Haugesund, så ser det bra ut i følgje den sportslege leiaren.

– Troppen ser god ut. Det er kun Truls Hovland og Even Vetås som er ute med skade, resten av gutane er fit for fight.

Korkje Lysekloster eller Haugesund har onsdag formiddag offentleggjort kven dei startar med i kampen.

Kan komma ei cupbombe

Frå Coolbet har Midtsiden fått eit lite cupbombevarsel før kveldens kamp.

– Våre oddssettarar har peika ut denne kampen som ein av kampane det kan bli ei cupbombe i. Start, Odd, Sandfjord og Stabæk er kvartetten det er utstedt dei største cupbombealarmane på, men rett bak der kjem faktisk Lysekloster mot Haugesund, seier PR-manager Mikael Mellqvist i Coolbet.com.

Lyseklostersiger gir 12,50 i odds hos selskapet. Norsk Tipping har satt oddsen til 8,75 på Lyseklostersiger, 5,00 på uavgjort etter ordinær tid og 1,18 på Haugesundsiger.

God start på sesongen

Haugesund tok seg til andre runde i cupen etter å ha slått Skjold 3-0 i første runde. Også i eliteserien har laget bite godt frå seg i starten av sesongen og ligg på fjerde plass med 13 poeng etter siger mot Odd (2-1), Bodø/Glimt (3-0), Strømsgodset (1-0) og Start (1-0) no i siste serierunde.

Gjestane frå Haugesund har også uavgjort mot Sarpsborg 08 (1-1) og tap for Molde (0-1) og Ranheim (2-4).

Lysekloster ligg på si side på femte plass i Norsk Tipping-ligaen avdeling 4 etter berre to kampar. Dei har fire poeng etter å ha slått Varegg 5-0 og spelt uavgjort 1-1 mot Viking 2.