Vestlandsmeister i stor bil

Karoline Breivik har denne sesongen køyrd både juniorklassa og i klassa for bilar over 2400 ccm.

– Den siste er klassa med dei største bilane kor eg har fighta med dei store guttane, ler Karoline når Midtsiden ringer for å gratulera med samanlagtsigeren.

Køyrde fire av fem løp

I vestlandsmeisterskapet for rallycross over 2400 ccm, som er den offisielle nemninga, har det vore fem løp, kor dei fire beste har vore teljande.

– Eg har køyrd inn til to sigrar, den eine i nest siste runde i Vikedal for halvannan veke sidan, ein andre plass og ein fjerdeplass no i helga i Egersund. Det holdt til siger samanlagt.

– Før Vikedal låg eg på andre plass, men sigeren der gjorde at eg tok leiinga før siste runde, fortel Karoline.

Var skeptisk

Før helgas runde i Egersund var ho skeptisk til om ho skulle klara å halde førsteplassen heilt inn.

– Det var tett bak meg, så eg var litt skeptisk før løpet, men når eg tok meg til finalen og køyrde inn til fjerdeplass visste eg at de ville helda.

Lite trening i Volvoen

Klassa vann ho med ein ombygd Volvo S40. I juniorklassa har ho køyrd ein Starlet og ein Golf.

– Den har morfar (Håvard Gaassand, journ.mrk) bygd om frå framhjulsdrift til bakhjulsdrift. Det har ikkje så mykje å seie for farten om det er framhjuls- eller bakhjulsdrift, men måten å køyre på er litt forskjellig. Dei andre bilane eg har køyrd har vore framhjulsdrift, så eg har måtte legg om køyringa litt når eg har køyrd Volvoen. Du må køyre på ein annan måte inn i svingane for at ikkje ræva skal slippe for mykje, så det blir ein litt annan køyrestil.

– Oppsummert har eg vel ikkje meir enn ti løp med Volvoen om eg reknar med treningsløp og alt. No når eg neste sesong kjem til å køyre berre den, så kan det berre bli betre og betre etterkvart som eg blir meir kjend med bilen og bakhjulstrekk, forklarar Karoline Breivik, som neste sesong vil køyra full NM-runde i supernasjonal klasse 4 (den same klassa som i vestlandsmeisterskapet heiter Rallycross over 2400 ccm). Ho vil òg freista å forsvara årets tittel som vestlandsmeister i klassa.