– Vi får heia på Hans

Fredag var det blant anna fusingen med adresse i Os, Gunnleiv Fossåskaret (28), sin tur å vera i semifinale i TV2-programmet Norske Talenter.

– Opptaket blei gjort i slutten av februar. Eg fekk beskjed om ikkje å ta med meg noko, vi skulle ikkje visa triks i denne runden, fortel han til Midtsiden.no.

VIDEO: Sjå Gunnleiv visa trisk til Midtsiden.

I staden skulle Fossåskaret og den andre tryllekunstnaren, Hans Henrik, fortelja om sitt neste triks. Hans Henrik var den einaste av dei som gjekk vidare.

– Han er nok kvassare enn meg. Eg forsto det sånn at han både jobbar som magikar og har ein tryllekunstnar-far å slekta på, så vi får heia på Hans Henrik no!

– Men eg synes det er litt synd at dei berre hadde plass til ein av oss. Det er mange songarar og dansarar vidare, sjølv synes eg trylling kan vera like underhaldande å sjå på.

– Har Norske Talenter gjeve deg inspirasjon til å trappa opp tryllinga?

– Eg veit ikkje. Kanskje eg passar best til å ta nokre triks på pub, ler Gunnleiv Fossåskaret.