– Vi har ei god ordning

– Har legevaktordninga blitt svekka når ikkje sjukepleiar rykker ut med vaktlegen lenger? var spørsmålet Helge Olav Nygård (Krf) stilte i politisk kvarter i tenesteutvalet i april.

Sist veke fekk han svar då brannsjef og einingsleiar for brann, redning og legevakt i Os kommune, Stein Gjøsund orienterte.

– Vi hadde ei veldig god ordning tidlegare med at sjukepleiar var med lege på utrykning.

– Dei kobla då legevaktesentralen til ein mobiltelefon og kunne difor svara også når dei var utanfor huset.

– Problemet er at denne ordninga var i strid med forskrifta. Framleis rykker sjukepleiar ut, men berre når dei er to på vakt, fortalde Gjøsund.

Betre enn på Stord

Etter omlegginga for om lag halvanna år sidan er det no first-responder frå brannvesenet som rykker ut saman med legen.

– Det er klart det er forskjell i kompetansen på ein first-responder og ein sjukepleiar.

– Samstundes skal det påpeikast at dei som køyrer som first-responder hos oss er tilsett på fulltid og har ambulansefagleg eller anna helsefagleg kompetanse.

– Fleire har fagbrev eller mangeårig erfaring i ambulansefaget, andre har brei sanitetsfagleg erfaring frå Forsvaret.

– I tillegg øver vi, og dei som går på vakt som sjåfør for legen blir trent både på å bruka medisinsk utstyr.

– Eg meiner vi har ei veldig god ordning i Os. Ein kan berre sjå til Stord, der legen må rekvirera drosje når han eller ho skal rykka ut.

To på fulltid blei for dyrt

I spørsmålet frå Nygård låg det òg eit spørsmål om kostnadar.

– Ordninga vi har no kostar cirka 150 000 til 200 000 kroner i året for kommunen.

– Skulle vi ha bemanna legevakta med to sjukepleiarar på vakt til einkvar tid ville det ha kosta kommunen totalt mellom 3,5 og 4 millionar årleg.

– Skilnaden mellom brannvesenet og legevakta er at vi for brannvesenet har ei dimensjoneringsforskrift som seier noko om kor mange som skal vera på vakt til einkvar tid. Tilsvarande finnst ikkje for legevakta. Der må vi legga ei kost/nyttevurdering til grunn.

Til Vestfold for å orientera

Nygård var nøgd med svaret frå brannsjefen.

– For andre kommunar kan ordninga vår framstå som råflott. Eg ser berre til Balestrand, kor eg kjem frå. Der må ein køyra i to og ein halv time for å koma til legevakta.

– Eg har òg forstått at spørsmålet mitt har skapt stort engasjement i organisasjonen. Det var eg ikkje klar over, sa ein tilfreds Nygård.

– Ja vi ligg langt framme, ikkje minst i høve eigen uniformert bil og personell.

– Vi blir stadig trekt fram som eit godt eksempel og skal no til ei konferanse i Vestfold kor fylkesmannen har invitert oss til å fortelje korleis vi tenker og organiserer oss på Os, avslutta Gjøsund.