– Vi har fått gode prisar

Tysdag ettermiddag holdt Statens Vegvesen tilbodsopning av entreprisen K10, som er den største og dyraste entreprisen på utbygginga av ny veg mellom Os og Bergen.

– Det var sju tilbydarar og fem av dei var norske.

– Alle dei norske ligg lågast i pris, og det er veldig tett mellom dei.

– Det er tydeleg at her har alle anstrengt seg og vi har fått ei reell og god konkurranse, fortel prosjektleiar i Statens Vegvesen, Sverre Ottesen.

– Hakket lågare enn venta

Dei sju selskapa og prisane dei har levert er:

• Leonard Nilsen & Sønner: 2.448.139.533 kr
• Strabag AG, Østerrike: 3.285.218.490 kr
• Skanska Norge AS: 2.398.074.480 kr
• AF-gruppen Norge AS: 2.392.292.666 kr
• CMC di Ravenna, Italia: 2.852.244.987 kr
• Hæhre Entreprenør AS: 2.372.621.968 kr
• Veidekke Entreprenør AS: 2.298.322.157 kr

– Det er gode prisar. Vi pleier jo å seie at det er som forventa, men her er det hakket under det vi hadde venta, seier Ottesen.

Strenge krav og stor jobb

Ottesen og medarbeidarane hans skal no kontrollrekna tilboda og kontrollera at formalitetane er i orden før dei gir si innstilling til ei kontrollnemd i vegvesenet som godkjenner val av entreprenør.

– Det er ein jobb som skal gjerast.

– I tillegg til kontrollrekninga skal vi sjekka at kvalifikasjonskrava er oppfylt, vi skal sjekka referansane og sjå at dei har gjort tilsvarande jobbar før og vi skal kontrollera at ingen av dei har gløymd påkrevde vedlegg.

– Har dei det, kan dei risikera å bli strokne frå konkurransa, fortel Ottesen som trur tilbydarane har dobbeltsjekka at alt er med både ein og to gonger.

– På ein så stor jobb som dette, så tek dei nok ingen sjanser.

– Fleire av dei har køyrd sjølv til Leikanger for å levera tilbodet, berre for å vera sikre på at det kom fram i tide.

– Det er kanskje ikkje så rart, når vi ser at denne jobben aleine tilsvarar opp mot årsomsetninga til fleire av selskapa.

Har treft innan 9-aren

Stortinget har løyvd 6,5 milliardar kroner til bygginga av Svegatjørn-Rådal. 21. april blei tilboda på den andre store entreprisen, K11 frå Fanavegen til Nordås og Flyplassvegen opna med lågast pris på 1,463 millionar kroner. Slår ein denne saman med lågaste pris frå dagens opning og legg på ein halv milliard i den tredje og siste store kontrakten som går på elektro og styringssystem så ligg ein godt ann.

– Du må legga på meirverdiavgifta og nokre hundre millionar til i andre mindre kontrakter i tillegg.

– Dessuten skal også planleggingskostnader og byggherrekostnadane våre reknast inn, men slik det ser ut i dag så bør dette halde.

– Eg er komfortabel i dag og vil seie at vi er innanfor 9-aren på blinken i høve dei kalkylene som blei lagt til grunn for stortinget, oppsummerar Ottesen.

Tidlegast start 1. oktober

Går alt etter planen og slik som Ottesen håper vil kontaktane for K10 og K11 bli signert rett for sommarferien i veke 27.

– Då kan vinnarane gå i gang med å kjøpe det utstyret dei treng, gjera avtaler med lokale lastebileigarar og andre underentreprenørar, planlegga brakkeriggar og kor arbeidarane skal bu.

– Vi har sagt at tidlegaste oppstart på den sørligste entreprisen som omfattar vegen i Os er 1. oktober.

– Om entreprenøren skal rekka det skal dei vera flinke til å snu seg rundt.

– For vår del speler det ikkje noko rolle om dei startar 1. oktober eller to månader seinare.

– Vi held oss til den kontraktsfesta sluttdatoen for når entreprenøren skal vera ferdig med jobben sin, avsluttar prosjektleiaren.