– Vi serverte dei kampen
Osdamene tapte 28-29 i eit nervepirrande oppgjer mot Kjøkkelvik sundag. - Vi serverer dei sigeren med altfor mange tekniske feil, meiner trenarane.
I går viste handballdamene til Os tildels klassespel då dei banka Årstad 34-25. Sundag venta tabellnabo Kjøkkelvik på motsett side av parketten.
Det blei sesongens første thriller i Oshallen.
- Jentene var heiltente og fokuserte før kampen så eg hadde ein god følelse, seier trenar Erlend Lyssand.
Kampen byrjar jamt og dei to laga følgjer kvarandre tett fram mot pause med Os eitt mål framfor 13-12.
Blei kontra i senk
Andreomgangen byrjar Kjøkkelvik best og dreg i frå med eit par mål.
- Vi gjer altfor mange tekniske feil, noko som gjer at vi får smaka eigen medisin med raske kontringar mot oss.
- Når vi tillegg blir nølande i angrep går det litt i stå, analyserer den andre trenaren, Torbjørn Bøthun.
Saman med Lyssand såg han at jentene så gjerne ville, men fekk det ikkje til.
- I dag var det vår eiga skuld at vi ikkje klarer å ta to poeng.
Laga ikkje brudda
I går spelte Osdamene det beste forsvaret hittil i sesongen. I sundagens kamp kom dei aldri opp på same nivå.
- Vi klarte ikkje å laga dei brudda vi ville i forsvar.
- Dei pleiar å gje oss kontringsmoglegheitene, men i dag fekk vi det ikkje heilt til, seier ein litt frustret Erlend Lyssand.
Inviterer til handballgalla
Neste heimekamp går òg på heimebane når Sotra besøkjer Oshallen laurdag 10. november til handballgalla med dobbeltkamp. Først damelaget klokka 16, så herrelaget, som framleis er ubesigra, tar imot Stryn klokka 17.45.
- Det blir ein handballlaurdag det er verdt å få med seg, lover Lyssand.
Os - Kjøkkelvik 28-29 (13-12)
Utv: Os 2x2 min, Kjøkkelvik 4x2 min
Os sitt lag: Irene Tangerås 7, Marte Haugsdal, Anna Bjørke Kallestad 4, Tonje Hjertnes 2, Emilie Hjertnes 5, Maria Stangeland Lunde 1, Marte Øvreeide 5, Line Hjelle Berentsen 2, Vibeke Ingebrigtsen, Elise Hjelle 1, Vilde D. Fyllingen 1, Vilde Brattabø.
Med sigeren passerte Kjøkkelvik Os på tabellen. Sjå tabellen her.