Vidare med eit nødskrik
NM-kvalik: Os avgjorde bortekampen mot Smørås på overtid.
Bildeserie:
Måndag ettermiddag spelte Os første av to kvalifiseringskampar til NM. Kampen gjekk på bortebane mot Smørås, som kom på 4. plass i si avdeling i 4. divisjon i fjor.
Smørås - Os 2-3 (1-1)
Målskårarar, Os: Preben Borgen og Stian Lunde 2
Os låg under to gongar i kampen, som Os dominerte, men var nær på å tapa.
Heimelaget tok leiinga tidleg i kampen, på ei klarering frå keeper, osingen og tidlegare Nore Neset-spelar Arne Veim Haugland. Preben Borgen utlikna i 33. minutt.
Hamna under igjen
Utan at det kom dei store sjansane såg det ut til at Os skulle ta leiinga før pause. Også i 2. omgang var det Os som hadde presset, men heimelaget kom på nokre farlege overgangar.
– Eg liker ikkje sånne kampar, der motstandarane tar ned tempo og legg seg lågt, og vi blir gåande og stanga mot etablert forsvar. Klareringane blei nokre lange ballar mot oss, og dei fekk det litt for enkelt på begge skåringane, meiner Os-trenar Tim Henrik Sperrevik.
I 66. minutt var det nemleg Smørås som igjen tok leiinga etter å ha runda forsvaret og keeper nær dødlinja på Os si venstreside.
Os fekk kontroll
Os var ikkje heilt finslipt i pasningsspelet i dag, men hadde ballen mest og hadde mesteparten av initiativet. Etter nokre gode innlegg og nokre frispark nær mål, som Preben Borgen ikkje fekk forbi Veim Haugland, var det ein retur på eit skot som gav Os ny utlikning.
Det blei tett med folk rundt keeper då ballen spratt ned framfor beina til kaptein Stian Lunde, som hadde blitt flytta fram frå midtforsvaret.
Lunde gjorde ingen feil og vippa inn til 2-2 i 84. minutt.
– Vi fekk ikkje til det spelet vi ville i dag, men det er klart at det er skuffande å leia to gongar og tapa i dei siste speleminutta, seier Smørås-trenar Ola Aandahl.
For tre sesongar sidan slo Smørås både Nordhordland og Voss før dei tok imot Sogndal på heimebane i cupen. Etter 2-2-utlikninga til Os i dag såg det ut til å gå mot ekstraomgangar.
Men på overtid kom ein lang kryssar frå Tore Valvik i Os-forsvaret til Stian Lunde på hjørnet av 16-meteren til Smørås. Lunde nikka ballen forbi ein langstrak Veim Haugland i lengste hjørne og Os slapp å spela ekstraomgangar fem dagar før seriestart.
Os: Anders Kloven - Fredrik Heggland, Per Søgnen Merai, Stian Lunde, Vegard Engelsen Moberg (Ramo Racic) - Torkel Hjertnes, Tore Valvik, Simen Lassen, Erik Kanestrøm - Preben Borgen, Christer Olsen.
Os startar serien på heimebane mot Bjarg førstkomane laurdag klokka 16.
Siste kvalik-kamp blir onsdag 18. april. Det er førebels uvisst kven Os møter.
Andre resultat frå 1. kvalik:
Askøy - Sotra 1-3
Baune - Radøy/Manger 0-2
Frøya - Bjarg 0-5
Hovding - Tertnes 2-1
Kaupanger - Voss 1-4
Nærbø - Stavanger 0-5
Stord - Øystese 1-2
Valestrand Hjellvik - Austevoll 0-3
Varegg - Bergen Nord 3-0
Voll - Staal Jørpeland 2-8
Kjelde: fotballen.eu/nm