Vidarefører Kjør for Livet

"Kjør for Livet", som er eit tilpassa fritids- og aktivitetstilbod for born og unge som er utanfor eksisterande fritidstilbod, blir vidareført i 2014/15.

Les òg: – Har gjort noko med meg

Formannskapet sette noregsrekord i rask sakshandsaming då dei gjekk inn for å støtta "Kjør for Livet" i mars 2012.

Etter eitt års prøvedrift forlenga dei avtalen til også å gjelda 2013/14.

Då budsjettkameratane i Frp/H/KrF/V la fram sitt budsjettforslag for 2014 vidareførte dei satsinga med å gje 200.000 kroner for sesongen 2014/15.

– Vi vil allereie no sikra oppstart av ein ny Kjør for Livet-gruppe i Os hausten 2014. Tilbodet første halvår 2014 er allereie finansiert gjennom eige formannskapsvedtak i 2013, grunngjev koallisjonen.

1 million i KUP-midlar

Også midlar for å vidareføra Kulturelt Utviklings Program (KUP) blir vidareført i 2014.

– KUP Os blir for 2014 justert slik at lag og organisasjonar ein gong i året, på våren, kan søkja kommunen om støtte til særskilte kulturtiltak.

– Vi flyttar éin million frå formannskapet sitt disposisjonsfond til kultur for å finansiera dette, forklarte Terje Søviknes (Frp) på vegne av busjettkameratane.

Også 8. og 17. maifeiringa får ei styrking ved at dei få 75.000 kroner til disposisjon. I tillegg set fleirtalet av 75.000 kroner i auka avsetjing til kjøp av bøker på biblioteket. Dette gjer at kulturområdet får styrka sitt budsjett med totalt 1,35 millionar til desse formåla.

Kyrkja får òg ein eingongssum til nye salmebøker på 100.000 kroner, som er i samsvar med den nasjonale satsinga.