VIDEO: Lysekloster - Smørås
Talentet Preben Skorpen (18) heldt fire fingrar opp då han sette inn 3-0, for no er venstrebacken toppskårar med 4 mål.
– Det var høgdepunktet den scenen der, ler Lysekloster-trenar Torbjørn Birkelund.
Preben Skorpen, som fyller 19 år seinare i år, sette inn to av Lysekloster sine tre mål i innhentinga til 3-3 mot Os.
SJÅ VIDEO NEDST I ARTIKKELEN
I går sette han inn sitt fjerde for sesongen, på fire kampar.
– Preben presterer frå start til slutt og er ein spelar vi kan bruka kvar som helst på banen. Då er det litt ekstra gøy at han som venstreback er toppskårar.
Lysekloster - Smørås 4-0 (1-0)
Mål: 1-0 Ramo Racic (30.), 2-0 Lars Henrik Skage (55.), 3-0 Preben Skorpen (77.) og 4-0 Lars Henrik Skage (85.).
Lysekloster (4-3-3): Chris Sunde Midtun - Baste Jonassen, Aleksander Andersen, Knut Eriksen Eide, Preben Skorpen - Kim Kleivedalen, Joakim Hjelmeland, Preben Borgen - Lars Henrik Skage, Simen Birkelund og Ramo Racic.
Lysekloster måtte klara seg utan blant andre Johanne Jordal, som var sjuk, og Tore Valvik, som har to kampar karantene etter gult og direkte raudt i førre kamp.
Lite motstand
Før gårsdagens møte med Lysekloster hadde Smørås berre skåra eitt mål på tre kampar. Dei starta sesongen med 0-5-tap for Bjarg og 0-6 tap for Varegg. Mot Odda blei det 1-4.
Lysekloster var overlegne, men det gjekk 30 minutt før dei tok leiinga på heimebane.
– De pressa mykje, og skapte nokre store sjansar, men er du nøgd med 4-0 og tempoet i kampen?
– Vi har trilla ball fortare enn dette før, men vi har, med fleire nye i troppen, framleis litt igjen når det kjem til relasjonar mellom spelarane.
– Men vi hadde mykje fint spel mot Smørås òg, og det var kjekt å sjå Hovden og Eidsvik gjera god figur då dei kom innpå.
– Dei eg vil trekka mest fram etter kampen er Preben Skorpen og Lars Henrik Skage. Skage skåra to mål og har sin andre kanonkamp på rad.
Lysekloster toppar tabellen etter gårsdagens kamp.
Neste heimekamp går mot Haugesund 2 måndag 26. mai.
VIDEO: Sjå knappe 4 minut av kampen. (Foto: KVB)