Viktig trepoengar

Håpet om tre poeng mot Haugesund 2 var høgt blant publikum på Lysekloster Idrettspark etter at Os slo Haugesund-laget 7-1 for vel to veker sidan. Det skulle bli jamnare måndag.

– Eg synest Haugesund er det beste laget vi har møtt på heimebane så langt i år, kommenterte Lysekloster-trenar Torbjørn Birkeland etter kampen.

Då hadde Lysekloster vunne 1-0 etter skåring av Joakim Hjelmeland åtte minutt ut i første omgang.

Skåringa og forarbeidet var godt lagspel.

Kim Kleivedalen tok ned eit langt oppspel ute på høgrekanten, hælsparka tilbake til Johannes Jordal som tok ballen med inn i 5-meteren og la den 45 gradar ut til ein umarkert Hjelmeland som sett ballen i mål mellom beina på ein Haugesund-spelar og utanfor keeperen si rekkevidde.

Blei liggande lågt

Etter skåringa blei Lysekloster liggande lågt i banen resten av omgangen.

– Vi blei liggande lågare enn det vi ønskjer på heimebane, men Haugesund var eit lag med ballsikre spelarar.

– Samstundes føler eg vi treff godt med presshøgda og jobber godt saman. Vi slepp dei ikkje til mange sjansar, analyserer Birkeland.

At analysen stemmer kan ein sjå på sjansestatistikken frå 1. omgang. Lysekloster er frampå to gongar i tillegg til målet, medan Haugesund ikkje har ei einaste farleg avslutning på Chris Sunde Midtun i Lysekloster-målet.

Høgare tempo

Andreomgangen blir prega av eit høgare tempo frå begge lag, noko som òg auka sjansestatistikken på begge sider, men fleire mål blei det ikkje.

– Vi blir litt for passive i eige spel og får ikkje til dei gode kombinasjonane i spelet vårt.

– Men vi gjer jobben defensivt anført av Tore Valvik som gjer ein viktig jobb.

– I tillegg synest eg Steffen Finsådal, som har vore ute med skade i nesten eitt år, gjer maksimalt av det vi kan venta av han i dag, avsluttar Birkelund.

Lysekloster - Haugesund 2 1-0 (1-0)
Gule kort: Preben Borgen, Lysekloster. Berge Ohm, Haugesund.
Lysekloster sitt lag: Chris Sunde Midtun, Steffen Finsådal, Baste Jonassen, Preben Skorpen, Aleksander Andersen, Johannes Jordal, Tore Valvik, Joakim Hjelmeland (Preben Borgen, 61. min), Kim Kleivedalen (Mattias Høiland, 83. min), Ramo Racic (Stefan Mauricio Bernsen, 61. min), Lars Henrik Skage.

Med sigeren over Haugesund er Lysekloster à poeng med Sotra og Lyngbø på toppen av tabellen.

Os er tre poeng bak.