midtsiden

Vil du prøva?

I kveld kan du få testa amerikansk fotball, laurdag er det open dag på motocrossbanen.

Av: Kjetil Vasby Bruarøy

Os Wolverines inviterer fredag kveld til tryout, som det heiter på fagspråket.

– Vi hadde tilsvarande prøvekveld i forfjor og hadde 35 innom. Rundt 15 av desse blei med på å danna stamma i det nystarta laget, fortel trenar Christian Detjen.

Stiller du på tryout i treningsklede får du låna resten av utstyret. Så går det frå stasjon til stasjon der du får prøva dei ulike delane av spelet.

Laget, som blei starta hausten 2009, har erfarne trenarar og tett samarbeid med storebror Bergen Storm. Sjølv er jervane medlemmar i Os turn og boltrar seg på nedre kunstgrasbane kvar fredag.

– Vi hadde ein fin sesong i fjor, med seriespel der dei mange ferske spelarane våre fekk god erfaring. No har 6 av våre spelarar gått til 1. divisjon medan vi er 18 igjen. I kveld håper vi å møta fleire osingar som er interessert i denne sporten, seier Christian.  

Motocross - for liten og stor

Motocrossmiljøet i Os har vakse seg stort. Ikkje berre blir det medaljar, og i år også plass på toppidrettsgymnas på nokre av utøvarane, grustaket er i tillegg ein sosial samlingsplass for heile familiar.

– Vi har eigen juniorbane og ungar ned i femårsalderen som kjører cross med søsken og foreldre, fortel Merete Lunde.

Laurdag inviterer klubben til open dag. Der kan både junior og senior få testa seg i lita og stor løype.

– Vi har syklar og utstyr for utlån. Kiosken er open og vi har trampoline og hoppeslott som tilleggsaktivitet for dei yngste.

Fleire saker