Vil følgja ungane frå år til år

Som eit resultat av at den norske skulen ikkje lenger driv med kristen trusopplæring på same vis som før har dei tilsette i Os kyrkje i to år arbeidd med å laga ein trusopplæringsplan for born.

– Planen omfattar årlege trusopplæringstiltak frå ungane blir døypte til dei er 18 år, fortel kateket Hildur Løkken Lillestøl.

Kvart år vil ungane i kyrkjelyden få invitasjonar til aktivitetar tilpassa deira alder, og målet er at så mange som mogleg vil nytta seg av tilbodet.

Dei tilsette ved kyrkja er allereie i gong med nokre av tiltaka, og denne helga har dei invitert alle 3-åringane til adventsamling med graut og utdeling av bok med adventskalender.

– Vi kjem til å ha adventssamling for 3-åringane i 6 av krinsane i Os laurdag. Sundag er vi så heldig å få besøk av teateroppsettinga Kirkerottene og då er alle som ønskjer det velkomne i Os kyrkja.

– I helga som var hadde vi arrangementet Lys Våken der 32 11-åringar overnatta i kyrkja og hadde eit kjekt program med måltid, godteri, underhalding og aktivitetar.

Tårnagenthelg og Natt i Tunet

Det har ikkje vore ei bevisst trusopplæring i kyrkja tidlegare då det er noko skulen har tatt seg av, men då skulen gjekk vekk i frå kristendomsundervisinga har kyrkja måtte ta konsekvensane av det.

– Poenget er at dåpsløftet ikkje lenger blir oppfylt i skulen og då må vi ta tak.

Nokre av dei andre tiltaka er dåpshelsing til 1- åringane, skapelsesdag med hobbygrupper for 7-8- åringane, tårnagenthelg med mykje spaning for 9- åringane, og Natt i Tunet med LAN, film og aktivitetar for 13- åringane.

Treng ein armé av hjelparar

Lillestøl fortel at trusopplæringsplanen er eit stort konsept og då dei starta med planlegginga blei det tilsett to personar, ein i full stilling og ein i 50 prosent stilling.

– Tiltaka gjeld rundt 4000 born over det heile så det er eit mykje større opplegg enn det vi har hatt til no.

Dei nye tiltaka skal ikkje erstatta kyrkja sitt kontinurelige arbeid, som kor, speidar og ulike klubbar vil halda fram som vanleg.

– Vi kjem til å trenge ein armé av frivillige og har laga ei brosjyre der vi inviterer foreldre og andre til å vera tiltaksfadder i dei aktivitetane ein ønskjer, seier Lillestøl, som håpar dei vaksne ser det positive med arbeidet og vil bli med og hjelpa til.

Nokre av aktivitetane blir ikkje starta opp enno, men Lillestøl reknar med at tiltaka for heile spekteret av aldrar skal vera dekka i 2016.

– Tiltaka er noko som må byggjast opp over tid, men etter kvart så håpar vi at det blir så kjent at det er ting borna er naturleg med på.