– Vil gjera noko
Politiet har fått fleire meldingar om at uvedkommande forsyner seg frå returkonteinaren ved Amfi Os. – Vi må prøva å gjera noko forebyggande, seier lensmannen.

Seinast tysdag kveld litt etter klokka 21 fekk politiet melding om at uvedkommande var i returkonteinaren for elektrisk avfall utanfor Amfi Os.
– Det er utanlandske borgarar var og forsynte seg, og det er ikkje første gong.
– Om dei treng delar for å få sett i stand andre øydelagde artiklar eller om dei er så nevenyttige at dei klarar å få tinga til å fungera att, veit eg ikkje, men dette er miljøavfall som skal handterast på rett måte og det er difor ikkje lov å forsyne seg.
– Når vi i tillegg opplever å finna att delar av avfallet strødd rundt forskjellige plassar, så må vi prøva å gjera noko, seier lensmann Oddbjørn Dyrdal.
Han vil difor ta initiativ til å sjå på korleis ein kan hindra tilkomst til avfallsorteringa.
– Vi må sjå kva vi kan gjera for å forebygga dette ved å låsa av konteinarar eller på annan måte hindra det, seier lensmannen.