Vil ikkje ha ei samanhengande blokk

I Plan- og bygningsutvalsmøtet før påske handsama politikarane igjen utbygginga av Lientomta i Hamnevegen (bak eldresenteret, journ.mrk). Administrasjonen hadde på førehand gått inn for at ein kunne gje dispensasjon for to av dei tre blokkene tiltakshavar søkte om.

Gode grep, men...

Nettopp den siste blokka, som strekk seg frå eldresenteret langs Hatvikvegen opp eit stykke forbi innkøyringa til Steinneset blei det store diskusjonstemaet også blant politikarane.

– Eg tykkjer det er gjort mange gode og riktige grep i høve dei kommentarane vi hadde sist vi hadde saka oppe. Spesielt er eg glad for opning av gangvegforbindelsen, det gir ein siktkorridor som er veldig bra i dette forslaget. Dei to bygga mot nord tykkjer vi også det er gjort gode grep på, innleia Espen Aspenes (Frp).

– Så har vi litt utfordringar på det bygget som er mot svingen. Det er gjort eindel oppmjuking og grep i høve den heildekkande fasaden som var i førre runde, men vi kunne ønskja oss at blokk 3 var enno litt meir i tråd med den opprinnelege skissa, fortsatte Aspenes.

– Kan du utdjupe kva som er problemet, undra Terje Sperrevik (TvS).

– Det går på det prosjekterte fasadeuttrykket som kommunestyret godkjente gjennom illustrasjonsplanen versus det som ligg prosjektert no, svara Aspenes.

Bindande illustrasjonsplan

I illustrasjonsplanen har nemleg kommunestyret godkjent punkthus med litt avstand mellom bygga, medan det i søknaden no er eitt samanhengande bygg.

– Dette prosjektet har ei historie i utvalet og kommunestyret og vi har gått mange runder med oss sjølv og i gruppene våre. Eg var ein av dei som snakka det opp og var med å få det godkjent i første runde med tanke på høgde, topografi og liknande.

– Alle dei endringane som har kome i etterkant tykkjer eg det har vore vanskeleg å forholde seg til. Vi vedtok ein illustrasjonsplan som er juridisk bindande. Sist vi hadde den oppe avslo vi hus 3. Eg ser det er gjort nokre grep, men eg kan ikkje stå i kommunestyret og seie at dette er greitt. Vi vil følgje administrasjonen på ja til hus 1 og 2, men ikkje hus 3, fortalde Trine Lindborg (Ap).

Var betre før

Lindborg fekk støtte frå kommunalsjef Aina Tjosås på at det har vore ei kompllisert sak.

– Vi har eit vedtak frå kommunestyret med ein juridisk bindande illustrasjonsplan. Det var bevisst for å unngå det vi er oppe i no. Det er freista å finna løysingar, men med hus 3 har det vore vanskeleg. For dei som skal bu i leilegheitene, så er løysinga heilt super. Spørsmålet er om det er eit sentrumsprosjekt eller ei bustadblokk som skulle lagt ein annan plass. Til meir inn i sentrum ein kjem, jo meir må vi tenkje på dei som skal oppholde seg rundt, som skal forholde seg til det og sjå på det.

– Administrasjonen meiner det var større variasjon i horisonten i det første prosjektet og det meiner vi er betre, forklarte Tjosås før partia såg seg nøydd til å ta eit gruppemøte.

I tråd med illustrasjonsplanen

Etter det kom Frp og Høgre tilbake med eit ekstra kulepunkt i vedtaket.

– Vi ønskjer ikkje færre leiligheiter og høgden er ok, men vi vil ha litt meir luft i hus 3. Den er vi ikkje nøgd med. Difor vil vi ha med ei kulepunkt som seier at den delen av planen skal endrast til å vera mest mogleg i tråd med illustrasjonsplanen, forklarte Aspenes.

Etter litt ytterlegare diskusjonar støtta heile utvalet administrasjonen sitt framlegg om å gje dispensasjon for bygg 1 og 2 og seie nei til bygg 3. Kulepunktet frå Aspenes fekk 7 (Frp/H/Ap) røyster og blei også vedteken.