Vil informera betre
4.500 Telenor-abonnentar i 10 kommunar i Hordaland var utan breiband og fiber måndag. Den einaste plassen dei informerte om feilen var på facebook.
"Gøy med fiber og internett frå Telenor. Ikke TV eller nett og absolut ingen informasjon om hva som skjer" skreiv ein Midtsiden-lesar i sms til redaksjonen måndag kveld.
I 14-tida måndag fekk Telenor problem med ein hovudruter som står i Bergen. 4.500 abonnentar i 10 ulike kommunar, inkludert Os, fekk problem med nett og mobil.
– Mobil gjekk det ikkje så hardt ut over, men mange var utan nett og dei som har fiber vatr også utan TV. Eg forstår at dei som var utan TV var spesielt opptatt av å få informasjon om framdrifta, seier regional informasjonssjef Per A. Meling til Midtsiden.
Måtte skifta utstyret
Feilen var retta igjen i 16-tida, men rundt klokka 18 kom same feilen igjen.
– Dermed måtte vi skifta utstyret som svikta, og det tok tid.
Rundt midnatt var Telenor-kundane på nett igjen.
Vil informera betre
På telenor.no sto det ikkje noko om driftsproblema måndag. Kundane blei heller ikkje orientert om status per sms.
Den einaste plassen vi fann informasjon var på Telenor si facebookside.
– Facebook er ein fin plass å nå ut til mange, men vi jobbar med å få til ei løysing der vi enkelt kan legga ut korte driftmeldingar på telenor.no også.
– Vi beklager at vi ikkje har nådd ut til alle og håper på å informera betre neste gong det blir behov for å orientera om status eller eventuelle tekniske problem.