Vil setja Os på kartet

Osøren Blues & Jazzfestival hadde onsdag årsmøte kor Tore Lekve blei gjenvald som leiar i festivalen.

- Vi hadde eit godt møte og har hatt eit aktivt år bak oss, kor vi har levert fine resultater også økonomisk.

- At vi klarer det er mykje takka vere gode samarbeidspartnarar i næringslivet, seier Lekve.

Ikkje berre blues og jazz

No har han saman med resten av gjengen bak festivalen invitert samarbeidspartnarar og andre til idémyldring i Vargasalen på Oseana laurdag 3. november.

- Det er viktig å presisera at dette ikkje er ei idemyldring for festivalen, men for alle som arrangerar konsertar og lignade i bygda.

- Saman kan vi setja Osbygda tydelegare på kulturkartet og få til akkurat det vi vil om vi dreg i same retning.

Nær 50 påmeldt

Allereie har nær femti deltakarar meld seg på samlinga.

- Vi har fått ein kjemperespons frå alle vi har vore i kontakt med.

- Her kjem mellomanna rockeklubben, næringslivet i sentrum og på Amfi, swingklubben og kommunen.

- Eg trur dette kan bli ein kjempekveld kor mange gode idear og tankar kan få lufta seg, smiler Lekve.

- Kan kven som helst stille?

- Ja, det er ope for alle. Vi har freista å fange opp dei vi veit om, men om det er nokon som føler dei har noko å bidra med er det berre å kontakta Tor Erik Hylland som organiserar det heile.

Avsluttar med konsert

Idemyldringa tek til klokka 19. Klokka 21.30 inviterar arrangørane til konsert i Vargasalen med Parchman farm Stompers som består av Olav Undeland, Alex Pettersen og Eirik Bergene.

- Det blir ein konsert etter same konseptet som vi køyrer på Peppes med servering og billettsal.

- Konserten er open også for dei som ikkje vil vera med på idemyldringa, forsikrar Lekve.

Allereie i kveld kan du få lufta bluesøyrene når go's Os med Steinar Lyssand, Ole Amund Gjersvik, Ove Gaasand og Magne Trengereid spelar på Haustbluesen på Peppes.