Lokal | 16. sep. 2011

Vil sikra for fotgjengarar

Vegvesenet vil setja opp to lysregulerte fotgjengarfelt på Søfteland.

Vil sikra for fotgjengarar
Andris Hamrefredag 16. sep. 2011 13:50

Statens vegvesen har bedt Os kommune om ei uttale til planane om å etablere lysregulert fotgjengarfelt på E39 ved krysset til Langedalen og krysset til Gåssandvegen.

- Det er ein kjempegledeleg nyheit, seier Kenneth Smørdal som bur like ved.

Smørdal har engasjert seg for å gjera noko med trafikktryggleiken for dei gåande på strekninga.

- Eg har ein jobb som gjer at eg er ute på vegen seint og tidleg. Det er ikkje få gongar eg har opplevd situasjonar som er heilt horrible, der berre flaks har hindra stygge ulykker.

- Det at det no kan sjå ut som om det kjem lysregulering er fantastisk. Heldigvis er det slik at bilistar flest respekterer raude lys, seier Smørdal som håper ei lysregulering kan få slutt på den russiske rulletten det er å kryssa E-39 i dag.

- No håper eg berre politikerane og byråkratane ikkje bruker for lang tid på å beslutta saka og at pengane finnest slik at det kjem raskt på plass, avsluttar Smørdal.

Første i Hordaland

Lysreguleringa vegvesenet planlegg å ta i bruk på Søfteland og tre andre plassar på E-39 mellom Os og Nesttun har ikkje tidligare vore brukt i Hordaland.

- Anlegget er av PUFFIN-typen og er ikkje blitt brukt i Hordaland tidlegare. Varianten har derimot blitt testa ut med positive resultat på Austlandet, skriv sakshandsamar Christer Kjerrgård Johannessen i vegvesenet til Os kommune.

Detekterar fotgjengaren

Det spesielle med PUFFIN-konseptet er at det har detektorar som oppdagar både dei gåande og dei køyrande og styrer ved hjelp av sensorane kor lang tid bilane skal få raudt lys for at fotgjengaren skal få kryssa vegen.

- Detektering av fotgjengarar i gangfeltet forlenger raudetida for køyretya, skriv Johannessen.

I praksis betyr det at om det er nokon som bruker lengre tid på å krysse vegen så blir det raude lyset ståande lenger, om ein løper over vegen blir lyset tilsvarande kortare.

Statens vegvesen skriv i saksutgreiinga til kommunen at den tradisjonelle «blinkande grøne mannen» som varslar at det grøne lyset er i ferd med å bli raudt igjen forsvinn. Tanken er at fotgjengarane skal slippe stresset den blinkande grøne mannen gjerne medfører.

Ei slik tilpassing av fotgjengarlyset vil gje ei smidigare trafikkavvikling også for dei køyrande i følgje vegvesenet si utgreiing, då stopptida for bilane vil vera tilpassa kor lang tid fotgjengarane bruker framfor ei fast kryssingstid.

Spennande? Vil du ha ukas høgdepunkt i innboksen?

Les meir om

Last ned Midtsiden-appen idag

No kan du følgja nyhende frå Os - rett i appen.

  • Gratis å lasta ned
  • Bli varsla straks noko skjer
  • Tilgjengeleg i App Store og Google Play Store
Last ned appen
For å få tilgang til alle sakene i appen må du vera abonnent.