Vil starta ungdomsklubb

For nokre år sidan var ungdomsklubben i ungdomshuset på Haugland eit kjært og populært tiltak.

- Av ulike grunnar har ikkje ungdomsklubben vore i drift dei seinaste åra. Det har vi lyst til å gjere noko med, fortel Riku Tikkanen, som saman med ungdomsansvarleg Nina Beate Fagerlid inviterer til ungdomsdisko fredag 13. april.

- Vi synes det er ein fin måte å starta på med å arrangera diskotek. På den måten kan vi lodda stemninga og sjå korleis interessa er.

- Håpet er at det blir såpass populært at det blir noko vi kan gjera minst éin gong i månaden, smiler eldsjela.

I første omgang inviterer dei elevar i 5. til 7. klasse. Klubben blir open for elevar frå heile Os, ikkje berre dei som er medlemmar i ungdomslaget eller går på skulen i nærområdet.

- Så får vi sjå korleis det utviklar seg. Kanskje kan det bli aktuelt også for dei litt større ungdomane med tida, seier Tikkanen.

Eit lokalt alternativ til Osøyro

Ungdomslaget er klar over at det finnest tilbod til målgruppa allereide på Os, men har fått tilbakemeldingar frå medlemmar at det er fleire som ikkje synes det er noko stas å ta bussen til Os.

- I tillegg er det ein del foreldre som nok er litt leie av å kjøra ungane til Os heile tida, så då fann vi ut at vi kanskje skulle gjera noko litt meir lokalt.

Lover minikonsert

Musikken som skal spelast på kvelden har arrangørane fått hjelp frå ungdomar til å setja saman.

- Dei skal sjølv få styra musikken. Vi har eit bra anlegg her i huset, så det trur eg skal bli veldig bra.

- Vi får òg besøk av ein lokal kjendis som kjem til å halda konsert. Kven det er har eg ikkje lyst til å røpa, det får ungdomane koma for å finna ut, seier Tikkanen med eit lurt smil.

Dørene opnar klokka 20 og er opne fram til klokka 23.

- Vi har sett eit tak på 100 personar. Derfor sel vi billettar på førehand. Om det ikkje blir utselt blir det sal i døra òg.

Yttarlegare informasjon om første ungdomsdisko på Haugland kjem i Midtsiden sin kulturkalender.