Kommunen har starta arbeidet med rullering av klima-, energi- og miljøplanen (KLEM) for Os kommune. Forslaget til planprogrammet og varsling av oppstart av planarbeidet var oppe i formannskapet førre veke.
Nokre av tema administrasjonen ønskjer å utgreiia i samband med planprogrammet er:
- Bilfrie sentrumsmiljø
- Spørsmål om bane/Hy- eller El-buss til/frå Os
- Redusert bilbruk og auka bruk av sykkel, kollektivtranport og gange
- Differensiert arealforvaltning i lys av auka utbygging og eit styrka jordvern og auka fokus på ålmenne friluftsinteresser
- Restriktiv parkeringspolitikk i senterområda og særskilt på og ved Osøyro
- Vudere etablering av bysykkelording (innkjøp av el-sykkelflåte for utleige)
- Etablere faste salspunkt i kommune- og nærsenter for lokal mat (landbruk og fiske)
- Høgambisiøse nybygg (f.eks. skular) når det gjeld klima-, energi- og miljømål
- Stoppe avrenning av miljøskadelege stoff (gjødsel, lausmassar m.v.) til omsynskrevjande naturmiljø (herunder alle vassdrag)
– Administrasjonen har trekt fram ei rekkje aktuelle område som er kort skildra i utkastet til planprogram. Desse er meint å vere eit bakteppe for ein politisk diskusjon og konklusjon, heiter det i saksframlegget.
Vil ikkje la politikarane styra
Planen, og ikkje minst oppfølging av den, vil vera ei sentral oppgåve for alle etatane i kommunen. For å sikra ei god forankring, peiker administrasjonen på at det er viktig at planen frå ein fleiretatleg utforming og at etatene forpliktar seg til å følgje opp mål og strategiar i planen, men politikarane ønskjer dei ikkje med i utforminga av sjølve planen.
– Arbeidsgruppa skal kunne fungere som ei frittståande gruppe (prosjektteam) når det gjeld innspel til mål, tiltak og virkemiddel. Dette betyr at gruppa skal vere friteke politisk styring og slik kunne levere innspel frå ein utelukkande fagleg ståstad, heiter det i utkastet til planprogram.
Rett nok er formannskapet foreslege som ei politisk styringsgruppe over ei administrativ styringsgruppe med rådmann, kommunalsjef, plansjef og prosjektsjef.
– Gjer det enkelt
Då formannskapet handsama saka peika dei på at planen må bli enkle å halde seg til.
– Det er bra vi gjer eit skikkeleg arbeid med KLEM-planen. Forhåpentlegvis blir det eit levande dokument og ikkje, som i dag, eit skuffeverktøy.
– Planprogrammet er veldig detaljert, eg er redd for at det blir ein veldig svær og omfattande plan. Eg vil senda eit signal om å gjera den så liten, men innhaldsrik som mogleg. Bergen kommune sin plan er ganske enkel, men det er god. Ikkje gjer det verre og meir komplisert enn det som er naudsyn. Eg blir litt skrempt av dei statlege og regionale planane vi må forholde oss til, men vi er innstilt på å bli betre på miljø- og klima, sa ordførar Marie Bruarøy (H).
– Samstundes så må vi ikkje gjera det så enkelt av vi ekskluderer oss sjølv, som i Lyseparken. Har vi Fusa med oss i bakhovudet, undra Helge Steinum (Ap).
Nils-Anders Nøttseter (MDG) peika på at ikkje alt Bergen gjorde er det rette.
– Det er ikkje sagt at Bergen har fasiten. Det kan vera nyttig å sjå til andre også, til dømes Oslo, som er kåra til miljøhovudstad for 2019.
Omfattande, for å enda enkelt
Kommunalsjef Aina Tjosås peika på at skal ein gjera det enkelt, så må ein starta omfattande.
– Planen til Bergen har blitt veldig grei, men den har vore gjennom ein lang planprosess. Utgangspunktet der var nok like komplekst som dette her. Vi må gjennom det for å enda på noko enkelt og rasjonelt.
– Vi har absolutt ikkje behov for å laga planane meir kompliserte enn det vi treng. Intensjonen er akkurat lik for oss, men vi må gjera eit stykke arbeid for å komma til det endelege produktet.
Den endelege KLEM-planen skal, saman med overordna klimaplan for Hordaland, leggast til grunn for all planlegging i kommunen når den blir vedtekten, truleg våren 2019.