Vurderer ny veg gjennom Hegglandsdalen

Hordaland fylkeskommune la tysdag fram ein moglegheitsstudie for fylkesvegnettet som følgje av ny ferjefri E39 mellom Bergen og Stavanger.

Fylkeskommunen ønskjer at val som blir gjort i samband med ny E39 stettar regional utvikling og det regionale transportsystemet. På oppdrag frå fylkeskommunen har Sweco Norge AS og Oslo Economics gjennomført ein moglegheitsstudie av vegsamband og ferjer i regionen.

I utgreiinga har fem nye tiltak i fylkesvegnettet blitt vurdert:

• Brusamband mellom Fusa og Os
• Samband mellom Austevoll og nye E39 på Reksteren
• Tverrsamband mellom Fitjar og E39
• Nytt ferjesamband mellom Kvinnherad og Stord
• Tverrsamband over Ålfjorden mellom E39 og E134, frå Etne til Ølen og Sveio

Brusambandet mellom Os og Fusa vil kunna redusera reisetida mellom Fusa og Bergen med 31 minutt. Venta trafikk vil vera mellom 2100 og 2600 ÅDT (Tal på bilar per døgn, journ.mrk). Ifølgje utgreiinga vil dette krevja ei høg investering og ha eit middels til høgt konfliktnivå.

«Om bru over Samnangerfjorden skal gi den reisetida som er føresett i Tabell 8-8, må fv. 137 gjennom Hegglandsdalen verte utbetra og vi har føresett ei gjennomsnittsfart her på 70 km/t.», heiter det i rapporten.

Opprusta veg eller tunnell?

Strekninga frå Rød til Osøyro er på om lag 8,3 km. Når det kjem til konfliktvurderinga i rapporten på strekket gjennom Hegglandsdalen skriv utgreiarane:

«Med ny bru må enten fv. 137 frå Rød til Osøyro rustast opp/utvidast eller det må byggast ny tunell frå Rød til kryss på E39 ved Endelausmarka. Fv. 137 går gjennom ein sprekkedal med middels landskapsverdi. I dalen er det vel etablerte landbruksområde og opprusting vil kunne føre til relativt stor omdisponering av dyrka mark. Det er også registreringar av ål som er kritisk truga og raudlista i vassdraget langs vegen, samt ytterlegare ein viktig naturtype.»

«Opprusting/utviding av fv. 137 frå Rød til Osøyro er vurdert til middels konfliktpotensial. Tunell frå Rød mot nytt kryss på E39 i Endelausmarka vil sannsynlegvis ha lågt konfliktpotensial i seg sjølve, men vi kunne generere utfordringar med deponering av massar.»

Rapporten ser òg på utpendling av kommunane mellom Bergen og Stavanger, forventa folkevekst og mogleg busettingsmønstre som følgje av ny E39.

Eigne bussar til Bergen frå Os

Fylkeskommunen har òg ansvaret for kollektivtrafikken. I rapporten skisserast følgjande omkring busstransport.

«Det er naturleg å tenke seg at kollektivrute langs E39 har to ulike konsept: Ein ekspress rute Bergen – Stavanger med få haldeplassar og som ikkje går innom Haugesund, og ein rute med nokre fleire haldeplassar og som går innom/til Haugesund.

Os vil det vere fornuftig å betene med eigne bussar i retning Bergen uavhengig av ruta Bergen – Stavanger/Haugesund. For sørgåande trafikk mot Leirvik, vil påkoplingspunkt vere knytt til kryss ved Svegatjørn.

Busshaldeplass på Svegatjørn vil ikkje vere ideell for kollektivtrafikk mellom Os og studieområdet sørover. Gitt Osøyro sin status som regionsenter kan det vere naturleg å vurdere om ei betre tilkopling er mogeleg. Området rundt Moberg kan vere aktuelt dersom det er mogeleg med omsyn til tunellar på E39. Ein eventuell haldeplass på Moberg kan då komme til erstatning for haldeplass ved Svegatjørn.

Ved oppbygging av Endelausmarka som nytt større arbeidsplasstyngdepunkt, bør det vere busshaldeplass for arbeidsreiser til og frå studieområdet her.»