Winckel med vokal på Hanne's

– Vi er på ein miniturné i desse dagar seier Mari Lyssand frå Winckel.

– Sist veke hadde vi konsert på Stord, og neste veke syng vi på Café Sanaa i Bergen.

I tillegg til Mari Lyssand finn vi Guro Dugstad, Kristine Bjånes og Elin Hestenes i den omreisande vokalgruppa.

Kvartetten har sunge saman i eit år no, og Lyssand seier prosjektet først var meint for å turnera ungdomsskular og Rikskonsertane.

– Det er ingenting gale med gymsalkonsertar, og ungdomsskuleelevar er glimrande publikum dei, men ettersom repertoaret vårt passar minst like bra for vaksne er det kjekt å ha konsertar utanom skuletida òg.

På torsdagens konsert vil den stemmeglade kvartetten servera godbitar frå pop og soul til viser, med litt rock, country og klassisk innimellom.