Ylvis sette rekord
Ylvis selte 300 billettar på to dagar og no, etter 6 dagar i sal, er det berre 6 billettar igjen. - Vi har aldri selt så mykje, så fort, fortel Janne Mari Hjelle.
Onsdag i førre veke sleppte ho nyhenda om at Ylvis kjem til Oseana fredag 21. desember.
- Det har vore heilt vilt. Trass i tett program og fleire gode humorshow på plakaten før jul gjekk Ylvis unna i rekordfart, fortel kulturhusvert Janne Mari Hjelle på Oseana.
I løpet av dei to første dagane selte Oseana drygt 300 billettar til dei populære bergensbrørne. I skrivande stund er det berre seks billettar igjen, og dei er spreidd i heile salen.
Mykje anna morro
For å trøysta dei som ikkje var raskt nok ute til å få seg billettar til Ylvis fortel Hjelle at det kjem mykje anna i same sjangeren no før nyttår.
- Eg vil spesielt trekka fram Klypa med Kjell Kjellen Bigset.
- Han er ein utruleg vittig sunnmøring som i haust har farta land og strand rundt med showet "Klypa - Laangt over streken".
- Framsyninga kom inn i programmet for berre halvanna veke sidan, og vi har allereie selt om lag 150 billettar, fortel Hjelle.
Ekstra med damene og storsjarmørar
I tillegg trekk kulturhusverten fram ekstraframsyninga med Marit Voldsæter, Lisa Stokke og Cecilie Steinmann Neess og showet med storsjarmørane Heine Totland og Gisle Børge Styve.
- Den opprinnelege framsyninga med damene er nesten heilt utselt. Om folk vil få med seg den kritikerroste framsyninga som nettopp hadde premiere i Grieghallen vil eg anbefala ekstraframsyninga.
- Verdt å få med seg er òg det musikalske showet med Heine Totland og Gisle Børge Styve.
- Dei to starta å jobba saman etter at Heine var på laget til Gisle Børge på Beat for Beat på NRK for nokre år sidan, avsluttar Janne Mari Hjelle.