Andre innbrot på tre veker

For tre veker sidan blei restauranten Aroydee utsett for innbrot, skadeverk og tjuveri.

Tjuven knuste ei rute for å ta seg inn i restauranten.

– Kassaapparatet blei knust og dei stal 1700 kroner i vekslepengar. I tillegg blei det stole noko drikke, fortel innehavar Marirosi Marcellin til Midtsiden.

I går formiddag, tre veker seinare, blei det oppdaga at det nok ein gong har vore innbrot i restauranten.

– Dei knuste ruta som var lappa saman frå sist, stal øl, vin, brus og farris, og tok med seg kassaapparatet, som er tomt.

– Vi har ikkje lenger pengar i kassen etter stengetid.

Politiet har ein mistenkt

Det var klokka 12.20 søndag at politiet blei varsla om innbrotet.

– Vi har sikra fleire spor, blant anna fingeravtrykk og blod, seier politioverbetjent Audun Hadler-Olsen.

Dei tekniske spora har førebels ikkje gjort nytte for seg, men basert på etterforsking har politiet allereie ein mistenkt i saka.