Båtbygging ved Baronselva

Bildeserie:

1 av 3

I dag starta marknadsdagane på Os og ein av aktivitetane for dei yngste er det båtbyggar Hallgeir Forstrønen Bjørnevik som står for.

– Eg har med meg ein del småbåtar med segl og strikkmotor, og bygger nokre på staden, seier Hallgeir, som også stiller ut ein oselvar han har bygd.

Les portrettintervju med Bjørnevik i magasinet Midtsiden.

Båtbyggaren har tatt seg fri for å sitja tre dagar på rad på Telthusplassen ved Baronselva i Os sentrum.

– Alle er velkomne innom med sine små, seier Hallgeir, travelt opptatt med å supplera alle dei unge med båt.

Fleire tilreisande utstillarar

Dei fleste butikkane og fleire restaurantar i Os flyttar utandørs i tre dagar denne siste helga i juni.

– I tillegg har vi eksterne utstillarar som blant anna sel Volkswagen, syltetøy, tresko, Tupperware og Oriflame, og vi har lag og organisasjonar, som Osfest, LHL, Os Turn Friidrett og nokre politiske parti, fortel leiar i Os Sentrumsforening, Geir Amundsen.

Moteshow og breakdance

På Telthusplassen blir det også rigga scene.

– Her skal vi ha både dans og moteshow.

Butikkane i Os viser sommarmoten dei har i hyllene på eige show klokka 13 laurdagen. Same dag skal det vera show med Sprek og Blid og med dansegruppene Tag the Floor og Funky 2.