Bjarg har sendt klage på Austevoll

Grunna omlegging av toppfotballen er det som kjent berre dei fire beste laga i 3. divisjon som ikkje rykker ned denne sesongen.

Os tapte for Varegg i helga, men heldt seg på 4. plass takka vera at Austevoll slo Bjarg 1-0.

No vil dette truleg snu, Bjarg har nemleg sendt klage då det blei oppdaga at Austevoll brukte ein spelar som skulle ha sona karantene.

– Oppdaga av publikum

Bjarg-trenar (og tidlegare Lysekloster-trenar) Torbjørn Birkelund seier han ikkje var klar over dette før kampen var over.

– Eg var først og fremst skuffa over at vi gjorde ein så elendig kamp. Det var ein Bjarg-supportar på tribunen som kom til meg og meinte AIK hadde brukt ein spelar som fekk sitt tredje gule i førre kamp, derfor huka eg av for protest på dommarkortet.

Då dei undersøkte saka nærmare såg dei at Austevoll-forsvarar Henrik Melingen fekk sitt tredje gule mot Varegg veka før Bjarg-kampen.

– Ein glipp av oss

AIK-oppmann Anders Tøsse seier Bjarg har rett. Melingen fekk gult kort mot Arna-Bjørnar i juni, mot Gneist i august og mot Varegg 1. oktober.

– Det er vi som har gjort ein feil, Melingen skulle ikkje spelt og det er beklageleg. For vår del har det ikkje så mykje å seia, men vi synest dette er forferdeleg synd for laga som no kjempar om å halda seg, seier Tøsse.

Han reknar med å få svar frå kretsen i løpet av onsdag og trur Bjarg for medhald.

Tøffare oppgåve for Os

To rundar står igjen og tabellen ser sånn ut før Bjarg sin klage er behandla:

1. Brann 2: 56 poeng
2. Sotra: 52 poeng
3. Varegg: 43 poeng
4. Os: 36 poeng
5. Åsane 2: 35 poeng
6. Bjarg: 34 poeng
7. Austevoll: 30 poeng

Om Bjarg får medhald går dei forbi både Åsane 2 og Os og overtar 4. plassen.

Sånn kan Os redda plassen i 3. divisjon:

Os har det likevel i eigne hender, men får ein tøff jobb.

Os tar imot Bjarg på laurdag, Åsane 2 speler borte mot serieleiar Brann 2.

Borte blei det 4-1-siger til Bjarg over Os, om Os vinn laurdag er det truleg ikkje nok, slik det i utgangspunktet såg ut som.

Åsane 2 må avgje poeng borte mot Brann 2 og Os må slå Bjarg og truleg òg ta poeng mot Sotra borte. Heime blei det 1-1 mellom Os og Sotra.

Om det blir uavgjort mot Bjarg til helga har Os likevel håp, men då må Os slå Sotra i siste runde i tillegg til at Bjarg og Åsane begge må snubla i innspurten.

Bjarg møter Tertnes (8. plass) i siste runde, Åsane 2 møter Vestsiden-Askøy (10. plass) i serieavslutninga.

TERMINLISTE OG TABELL