– De må utfordra oss

Kommunalsjefen ber om at politikarane tørr utfordra administrasjonen når utvidinga av Luranetunet no tek til.

– Hovedutfordringa for tenesteområdet blir å laga ein så god kravspekk som mogleg til dei som skal byggja ut på Lurane.

– Det skal vara i minst 20 år, då spørs det kor mykje Møllers Tran vi skal ta. Kor hardt skal det satsa?

– Då Lurane blei vedtekten var forslaget 40 plassar, men det kom eit benkeforslag på 80. Det har vi trengt.

– Kanskje må vi ta innover oss at vi kanskje må vera litt spenstige no når vi skal utvida på nytt.

– Kanskje må de politikarar utfordra oss på om vi har tatt nok i, inviterte kommunalsjef Nils-Petter Borge i tenesteutvalet onsdag.

Frivillig omsorg blir viktig

Rådmannen har teikna eit bilete av den demogratiske utviklinga i Os kommune som allereie frå 2017 har eit bratt kurve når det kjem til den eldste delen av befolkninga.

– Pensjonistforeninga har vore litt kritiske til at dei ikkje sit i prosjektgruppa, men eg kan forsikra om at vi kjem til å bruke referansegruppa aktivt under heile prosessen.

– Spreke pensjonister treng vi inn i tenestene våre. Frivillig omsorg blir avgjerande for korleis vi lykkast i omsorgstenestene vår.

– Vi må laga eit system som tek vare på frivilligheita, forklarte Borge.

Dette fekk Borge støtte på frå politikarane.

– Eg er einig i det som går på frivilligheit og dugnad, det må nok bli enno meir av det. Os pensjonistforening er kanskje av dei som har vore best på det oppgjennom åra, sjå berre huset dei har fått til gjennom frivillig innsats.

– Samstundes treng dei offentleg støtte. Eit lite bidrag kan gjera stor skilnad, påpeika Anders Hjelle (TvS).

– Eg gler meg til vi kjem igang med Luranetunet og vidareutviklinga der oppe. Vi skal nok klara å utfordra prosjektgruppa i dette.

– Frivilligheit og dugnad er noko eg brenn for. Vi må byggje opp og finna gode måter i forhold til å ta vare på den energien dette byggjer opp under.

– Pensjonistforeninga, Sanitetsforeninga og Frivilligheitssentralen er sentrale i den sammenhengen. Dei gjer, og kan gjera, ein viktig jobb i forhold til målet om at fleire skal bu heime lenger og ha ein meiningsfylt kvardag, kommenterte Eirik André Hesthamar (Frp)