– Det er mange vegar til målet

Bildeserie:

1 av 2

Det blei fullt på Bar(t) tysdag ettermiddag då Høyre skipa til eit partinøytralt møte mellom ungdom på søken etter kva dei skal bli når dei blir store og vaksne som har tatt sine val, både ein og to ganger.

– Dette var ein start, så får vi sjå korleis vi kan ta det vidare, sa Susanne Sperrevik etter arrangementet.

15-16 ungdommar hadde møtt opp for å få ein prat med ulike yrkesutøvarar frå politi og brannmann til frisør og lærar.

Ingen val er feile

Etter eit innleiande motivasjonsforedrag frå kjæresteparet Jonny Hesthammer (mellomanna grunnleggaren av Rocksource, no administrerande direktør i Atlantic Petroleum Norge og professor ved universitetet i Bergen) og Anne Marie Brusdal (tidlegare lærar og journalist mellom anna i TV2).

– Inga val er feile, mislykka eller bortkasta. Det er mange vegar som leier til målet, ofte kan det vera den lengste vegen som er den vakraste og mest spennande, fortalde Brusdal.

Du kan ta nye val

Sjølv vurderte ho å bli farmasøyt då ho skulle velgja retning, men landa på den utdanninga ho først forkasta, nemleg lærar før ho gjekk vidare og blei journalist i 18 år.

– Du kan ombestemme deg og ta nye val. Det viktige er at du kjenner deg sjølv og kva person du er.

– Du kjenner fort om det er noko du trivst med og har det gøy i. Det må vera ein kombinasjon av hjarte og fornuft.

Krev ekstra innsats

Dei to motivatorane var tydelege på at det ikkje berre er fryd og gammen.

– Skal ein bli god i noko, så må ein øva. Det handler ikkje om å ta store jaft, men å gjera den lille ekstra innsatsen kvar dag. Det er den som tilslutt gjer den store forskjellen.

– Tenk moglegheiter og ikkje begrensingar, lag deg ein plan om kor du vil, både på kort og lang sikt, oppmoda Hesthammer, som sjølv tok utdanninga som geolog i Vancouver i Canada.

– Der brukte eg tre månader kvar sommar til å bu ute i vildmarka i telt med både svartbjørn og ulv rundt meg. Eitt av dei meste vellukka vala eg nokon sinne har tatt. Tilsaman budde eg vel ni månader ute i skogen, fortalde Hesthammer.

Etter foredraget mingla ungdommane med dei ulike yrkesgruppene som var til staden.

Spørsmål om kva utdanning som krevdes, kvifor dei vaksne hadde vald nettopp dei yrka dei hadde vald og om dei ville anbefala yrket gjekk igjen.